Prezıdenttikke kandıdat Qaraqat Ábdenniń el óńirlerindegi saılaýaldy saparlary jalǵasýda.
Búgin kandıdat Shymkent qalasyndaǵy «AGF Grýpp» atty tigin fabrıkasynyń ujymymen júzdesti.
Kezdesý barysynda kandıdattyń baǵdarlamasy tanystyrylyp, qoǵamdaǵy ózekti máseleler men áleýmettik suraqtar talqylandy. Tigin fabrıkasy ujymynyń basym kópshiligi áıelder qaýymy bolǵandyqtan, olardyń tarapynan kandıdat usynǵan áıel-analardy, kóp balaly otbasylardy qoldaý men ulttyq qundylyqtardy dáripteýge qatysty sharalarǵa basa mán berildi.
«Otbasy men analardyń áleýmettik máseleleri – bul el ekonomıkasynyń damýyn kórsetetin birden-bir kórsetkish. Meniń saılaýaldy baǵdarlamamda bul suraqtarǵa kóp kóńil bólingen. Árbir otbasy, ásirese kóp balaly otbasynyń rýhanı-ónegelik áleýeti zor, sondyqtan ol halyqtyń ǵasyrlar boıy jınaqtalǵan ulttyq qundylyqtaryn saqtap, urpaqtan-urpaqqa jetkizetin mańyzdy uǵym bolyp tabylady. Qazirgi kezde otbasy ınstıtýtyn jan-jaqty nyǵaıtý, onyń mártebesin arttyrý, kóp balaly analarǵa qoldaý kórsetý erekshe mańyzdy», - dedi Q.Ábden.
Sondaı-aq búgingi kezdesýge OBSE baıqaýshylar mısıasynyń ókilderi Krıstofer Makkaloý men Krıstına Bogdanova qatysty. Olar úgit-nasıhat naýqanynyń barysymen, Qaraqat Ábdenniń saılaýaldy shtabtarynyń jumysymen tanysty.
Eske salsaq, elimizde 20 qarasha kúni kezekten tys prezıdent saılaýy ótedi. Kandıdat Q.Ábden el aımaqtaryn aralap, 8 oblysta 30-dan astam kezdesý ótkizdi. Aldaǵy ýaqytta ol Túrkistan jáne Jambyl oblystarynyń saılaýshylarymen júzdesedi.