Qańtardyń 12si men 22-si aralyǵynda AQSH-tyń Leık-Plesıd qalasynda qysqy ýnıversıada ótedi.
Halyqaralyq stýdenttik sport federasıasynyń ókilderi Brússelde bas qosyp, sharaǵa daıyndyq barysyn pysyqtady. Bizdiń el de osy federasıanyń beldi múshesi, dep habarlaıdy Almaty-akshamy.kz.
Qazaqstan tarapynan basqosýǵa Ulttyq stýdenttik sport Odaǵynyń Prezıdenti Qaırat Zakıránov qatysyp, Qazaqstannyń ýnıversıadaǵa daıyndyǵy jaıly baıandady. Baıraqty básekede eldiń namysyn 84 sportshy qorǵamaq. Olar qysqy sporttyń 12 túri boıynsha baq synasady.
«Ýnıversıadaǵa qatysý úshin sportshylar halyqaralyq deńgeıde moıyndalǵan ekpe saldyrtýy tıis. Qazaqstanda Pfaızer joq. Basqosýda osy problemany kóterip edim, Amerıka tarapy bizge qajetti vaksınany jiberetinin jáne vıza rásimdeýge qoldaý kórsetetinin málimdedi. 2017 jyly Almatyda ótken qysqy ýnıversıadany Halyqaralyq stýdenttik sport federasıasynyń basshylyǵy ýnıversıada tarıhyndaǵy eń úzdik dep moıyndady. Olar qazaqstandyq stýdenttersiz ýnıversıadany elestetý múmkin emes ekenin aıtyp, sportshylardyń jarysqa qatysýyna barynsha qoldaý kórsetetinderin málimdedi», - deıdi Qazaqstan ulttyq stýdenttik sport odaǵynyń prezıdenti Qaırat Zakıránov.