«Halyq qatysatyn búdjet» jobasy boıynsha daýys berýde Almaty qalasynyń qaı aýdandary kósh bastady
2024 jyldyń 22 qazany men 1 qarashasy aralyǵynda «Halyq qatysatyn búdjet» baǵdarlamasy aıasynda Almaty qalasyn abattandyrý jobalaryna onlaın daýys berý ótti. Kelesi kezeńde onlaın daýys berýdiń qorytyndysy shyǵarylady.
Qalanyń árbir aýdan ákimdigi qabyldanǵan ótinishter men árbir jobaǵa daýys bergen azamattardyń sanyn kórsete otyryp, daýys berý nátıjelerin qalyptastyrady jáne taldaıdy. Qorytyndylaý 2024 jyldyń 7 qarashasyna deıin jalǵasady.
Barlyǵy 163 582 daýys berildi, bul 2023 jylmen salystyrǵanda 31%-ǵa artyq. Qala turǵyndary bıylǵy jyly kelesi sanattar boıynsha eń kóp jobalarǵa daýys berdi
- qoǵamdyq oryndarda eresek turǵyndardyń demalýy úshin besedkalardy, oryndyqtardy, qoqys jáshikterin, balalar jáne sport alańdaryn ornatý jáne jóndeý - 55 708 daýys
- aýla aýmaqtarynda jáne qoǵamdyq oryndarda sport jáne balalar alańdaryn ornatý, jóndeý jáne jaryqtandyrý - 33 577 daýys
- qoǵamdyq aýmaqtardy qurý, jóndeý jáne jaryqtandyrý – 32 898 daýys
Daýys berýde kelesi aýdandar kósh bastady: Medeý – 36 726 daýys, Almaly – 28 765 daýys jáne Jetisý – 25 684 daýys. Ótken jyly saılaýshylardyń basym bóligi Medeý aýdanynda daýys bergen.
Almaly aýdanyndaǵy tirkeý nómiri 24102020003 bir joba 1904 daýys jınady. Tóle bı 160/24, Áýezov 32 jáne Bógenbaı batyr 255 úılerdiń turǵyndary óz aýlalaryn sý basýmen kúresýge jumyldyryldy. Birlesken kúsh-jigerdiń arqasynda joba jasalyp, sqemalyq eskızi syzylyp, aldyn ala smetasy esepteldi. Tatý kórshiler óz bastamalarymen «Halyq qatysatyn búdjet» baǵdarlamasyna belsene atsalysyp, daýys sany boıynsha aýdannyń kóshbasshysy atandy.
Eń kóp daýys jınaǵan jobalardy aýdan ákimdikteri 2025 jyly júzege asyratyn bolady.
«Halyq qatysatyn búdjet» baǵdarlamasy boıynsha keńes nemese aqparatty aýdan ákimdikterinen, sondaı-aq Almaty qalasy ákimdiginiń Open Almaty Qoǵamdyq qabyldaýynan 224 39 29 (ishki 203) telefony arqyly alýǵa bolady.
Eske salaıyq, Almaty ákimi Erbolat Dosaevtyń tapsyrmasy boıynsha 2024 jyly «Halyq qatysatyn búdjet» baǵdarlamasy boıynsha qarjylandyrý 18,8 mlrd teńgege (2023 jyly 12,9 mlrd) deıin ulǵaıtyldy. Bıylǵy jyly aýdan ákimdikteri 2023 jylǵy daýys berý jeńimpazdarynyń jobalaryn júzege asyrýdy jalǵastyrýda, búgingi tańda 261 joba júzege asyryldy.