Túrksib aýdanynda «Halyq qatysatyn búdjet» boıynsha 28 joba maquldandy jáne 2022 jyly iske asyrylady
Baǵdarlamanyń júzege asyrylý barysy týraly Almaty qalasy Túrksib aýdany ákiminiń orynbasary Naıl Lebaev Óńirlik komýnıkasıalar qyzmetiniń brıfıńinde málimdedi, dep habarlaıdy Almaty-akshamy.kz.
«Bizdiń aýdanda «Halyq qatysatyn búdjet» baǵdarlamasyn júzege asyrý jalǵasýda, onyń maqsaty – aýdandy abattandyrý boıynsha jobalardy júzege asyrýǵa turǵyndardy tartý. Turǵyndardyń bastamashyl usynystary boıynsha 2021 jyly 22 nysan abattandyrylyp, túrli shaǵyn sáýlet nysandary ornatyldy, basketbol, fýtbol, voleıbol jáne vorkaýt alańdary jabdyqtaldy. 2022 jyly turǵyndardyń ótinishi boıynsha 28 joba maquldandy», - dedi N. Lebaev.
Maquldanǵan jobalarǵa Maılın kóshesi boıynsha jaıaý serýendeý aımaǵyn qurý (bólý jolaǵy), Maılın kóshesi, 54 boıynsha skverdi bólý, Seıfýllın dańǵyly - shyǵys/batys jaǵy boıynsha kirý tobyn abattandyrý, Aqkerbez kóshesi boıynsha jaǵalaý aımaǵyn jóndeý, sondaı-aq balalar oıyn alańdaryn ornatý jumystary kirdi.
Qazirgi ýaqytta 9 joba boıynsha jumystar bastaldy: Rysqulov dańǵyly men burylysyndaǵy avtoturaqty jóndeý. Aıtyqov kóshesi jáne Kóbeev kóshesi, 196 boıynsha jaıaý júrginshiler jolyn aǵymdaǵy jóndeý, Zakarpatskaıa kóshesi boıynsha balalar oıyn alańyn jaılastyrý jáne t.b. Moldaǵalıev kóshesi boıynsha jaıaý serýendeý aımaǵynyń qurylysy boıynsha jumystar bastaldy.
Maıak toǵaıyn abattandyrý jáne Maılın - Buqtyrma kóshesi boıyndaǵy Jarbulaq ózeni arnasynyń jekelegen ýchaskelerin rekonstrýksıalaý jumystary júrgizilip jatqany belgili, onda serýendeý aımaqtary, demalys aımaqtary men oıyn alańdary kózdelgen.
Sonymen qatar, balalar shyǵarmashylyǵy úıi, «Áýejaı dańqy» skverlerin jáne ÚAK úsh jaǵajaı aımaǵyn abattandyrýmen qatar rekonstrýksıalaý boıynsha jobalaý-smetalyq qujattama ázirlenýde.
Abattandyrý taqyrybyn támamdaǵan N. Lebaev jyl sońyna deıin 32,5 myń kóshet otyrǵyzý josparlanǵanyn habarlady. Jyl basynan beri 1530 túrli tuqym, 1650 sharshy metr bir jyldyq, 647 sharshy metr raýshan gúlderi jáne 620 sharshy metr kóp jyldyq kóshetter otyrǵyzyldy.