Bıyldan bastap «Qazaqstannyń halyq ártisi» ataǵy qaıta taǵaıyndalatyn boldy.
Bul Memleket basshysy Qasym-Jomart Toqaevtyń tapsyrmasy boıynsha qolǵa alyndy. Qurmetti ataqqa laıyq dep tanylǵan mádenıet qaıratkerleri Respýblıka kúni qarsanynda marapattalady, dep habarlaıdy Almaty-akshamy.kz Egemen.kz-ke silteme jasap.
Qurmetti ataq elimizdiń teatr, sırk, mýzyka jáne kıno ónerin damytýǵa erekshe úles qosqan, osyǵan deıin «Qazaqstannyń eńbek sińirgen ártisi» nemese «Qazaqstannyń eńbek sińirgen qaıratkeri» ataǵyna ıe bolǵan mádenıet qyzmetkerlerine beriledi.
«Qazaqstannyń halyq ártisi» ataǵyn qaıta berý memleket tarapynan óner qaıratkerleriniń eńbegin baǵalaýǵa, kásibı qasıetterin damytý jáne jetildirýge, kásibı sheberlik deńgeıin arttyrýǵa jáne jańa óner týyndylaryn jasaýǵa yntalandyrýǵa, jas býynnyń shyǵarmashylyq ósýine yqpal etedi, - dedi Mádenıet jáne sport mınıstri Asqat Oralov.