Bilim saıysyna 20-dan astam eldiń komandasy qatysady.
Olımpıadany uıymdastyrýshylar jarys ótetin zerthanalar men aýdıtorıalardyń tehnıkalyq jabdyqtalýyn joǵary baǵalady, dep habarlaıdy Almaty-akshamy.kz
1-6 mamyr aralyǵynda Qazaqstanda oqýshylar arasyndaǵy hımıa páninen 57-shi Halyqaralyq Mendeleev olımpıadasy ótedi.
"Respýblıka Úkimeti men Bilim jáne ǵylym mınıstrliginiń jan-jaqty qoldaýymen Mendeleev olımpıadasy 2002, 2012 jáne 2017 jyldary Qazaqstanda ótti. Bul halyqaralyq aýqymdaǵy jarysty joǵary deńgeıde ótkizý múmkindigin dáleldeıdi. Bıylǵy jyly Halyqaralyq Mendeleev olımpıadasynyń negizgi is-sharalary Astanada, Nazarbaev ýnıversıtetiniń zerthanalary men aýdıtorıalarynda ótedi. Ýnıversıtettiń tehnıkalyq jabdyqtalýy olımpıadany ótkizýge barlyq jaǵynan tolyq sáıkes keledi", - dedi Qazaqstan Respýblıkasy oqý-aǵartý mınıstrliginiń "Daryn" Respýblıkalyq ǵylymı-tájirıbelik ortalyǵynyń dırektory Ǵajdembek Tursynov.
Mendeleev olımpıadasyna qatysatynyn qazirdiń ózinde 20-dan astam eldiń komandasy rastady. Dástúrli túrde Avstrıa, Ázirbaıjan, Armenıa, Belarýs, Bolgarıa, Vengrıa, Izraıl, Qazaqstan, Qyrǵyzstan, Makedonıa, Mońǵolıa, Birikken Arab Ámirlikteri, Reseı, Saýd Arabıasy, Sırıa, Tájikstan, Túrkimenstan, Túrkıa, Ózbekstan, Horvatıa jáne taǵy basqa eldiń komandalary qatysady. Brazılıa quramasy týrnırge qatysýǵa alǵash ret ótinim berdi.
Olımpıadany uıymdastyrý komıtetiniń tóraǵasy, Reseı ǵylym akademıasynyń vıse-prezıdenti jáne Máskeý memlekettik ýnıversıtetiniń hımıa fakúltetiniń ǵylymı jetekshisi Stepan Kalmykov 2023 jylǵy Olımpıada barlyq kovıd shekteýleri joıylǵannan keıin betpe-bet formatta ekinshi ret ótkizilip otyrǵanyn aıtty.
"Bıyl elderdiń qatysýǵa joldaǵan ótinimderiniń sany birden 30%-ke ósti. Biz Ǵylym men tehnologıa onjyldyǵy maqsattaryna qol jetkizýge óz úlesimizdi qosa otyryp, qatysýshy memleketter sany odan ári keńeıedi dep kútemiz", - dedi ol.
Jarys ádette bes-alty kúnge sozylady jáne úsh kezeńnen, atap aıtqanda, eki teorıalyq jáne bir praktıkalyq kezeńnen turady.
Halyqaralyq Mendeleev olımpıadasy-57 is-sharasynyń ashylý jáne jabylý saltanaty Olımpıadanyń resmı paraqshalarynda tikeleı efırde kórsetiledi.