Enjarlyq pen «maǵan báribir» degen ustanym - eń qaýipti dert...
Jeltoqsan ardageri, akter jáne Qazaqstannyń Mádenıet salasynyń úzdigi Halel BAIaDILOV alda ótetin referendýmǵa baryp, daýys beretinin aıtty, dep habarlaıdy Almaty-akshamy.kz.
«Osydan otyz jyldan astam ýaqyt buryn Qazaq eli egemendikke qol jetkizip, 1993 jyly Táýelsiz Qazaqstannyń alǵashqy Konstıtýsıasy qabyldandy. Buǵan biz, árıne, qýandyq. Biz 1986 jyldyń «Yzǵarly jeltoqsanynda» demokratıaǵa umtylyp, totalıtarlyq júıege qarsy shyqqan alǵashqylar boldyq. Jeltoqsannan soń bes jyldan keıin elimiz egemendigin alyp, Táýelsiz el bolyp, óz memleketimizdi ulyqtadyq. Egemendigimizdiń eleń-alańynda talaı tuıyqqa tireldik, talaı synnan óttik, ekonomıkalyq-saıası qıyndyqtar kóp boldy. Eń bastysy, shekaramyzdy belgilep, halyqaralyq qaýymdastyqtyń tolyq múshesi bop, otyz jyldy soǵyssyz ótkizdik. Osy otyz jylda burynǵy odaqtas respýblıkalardyń birtalaıynda qaqtyǵystar oryn alyp, geografıasy qaıta syzylǵanyn da bilemiz. Qazaqstandy sondaı jaǵdaılardan qudaı saqtady. Desek te, osy otyz jylda Ata Zańymyzǵa birtalaı ózgerister engizildi. Bálkim sol ýaqyttaǵy saıası ahýaldarǵa baılanysty bolar, bálkim memleket basqarýdaǵy qajettilik shyǵar, qalaıda ol ózgerister qarapaıym halyqpen kelisilip jasalǵan joq edi...
Búginde halyqpen keńesip, qoǵamǵa, memlekettik qurylymǵa, egemen eldi basqarýǵa birshama ózgerister engizý ýaqyty kelgendeı. Eń bastysy, bir qolǵa shoǵyrlanǵan «sýperprezıdenttik» bılikten bas tartyp, saıasattaǵy óte juqpaly «jeke basqa tabyný» syrqatyn juqtyrý qaýpinen boıdy aryltý kerek. Ata Zańymyzdan bastap, barlyq memlekettik zańnamalardy kúsheıtip, olardyń buljytpaı oryndalýyn qadaǵalaý ýaqyty keldi.
Memleket basshysy Qasym-Jomart Toqaev konstıtýsıaǵa tolyqtyrýlar men ózgerister engizý jóninde refrendým jarıalap otyr. Sonymen qatar búgingi tańdaǵy eń ózekti degen ózgeristerdi Ata Zańnan bastap otyr. Meniń túsinigimde Qazaqstan halqy 5 maýsym kúni ortaq iske jumylýy tıis, referendýmǵa qatysyp, óz pikirin bildirip, daýys berýi kerek. Táýelsiz memlekettiń azamaty retinde óz pozısıasyn bildirýi qajet. Enjarlyq pen «maǵan báribir» degen ustanym - eń qaýipti dert..
Al meniń ustanymym belgili. Ol – oń ózgeristerge daýys berý. Men Qazaqstan Respýblıkasynyń azamaty, akter, QR Mádenıet salasynyń úzdigi, Jeltoqsan ardageri, PQ «JELTOQSAN AQIQATY» RQB basqarmasynyń múshesi Halel Ońǵaruly Baıadılov Memleket basshysy Qasym-Jomart Toqaevtyń bastamasyn qoldaımyn jáne jalpyhalyqtyq referendýmǵa qatysyp, oń ózgeristerge daýys beremin!», - deıdi Halel BAIaDILOV.