XII Halyqaralyq Túrki álemi zertteýleri sımpozıýmynda Qazaq ulttyq qyzdar pedagogıkalyq ýnıversıtetiniń Basqarma Tóraǵasy – Rektory, profesor Gúlmıra Qanaı «Túrki áıelderi ensıklopedıasyn» jazýdy usyndy, dep habarlaıdy aqshamnews.kz.
Nııde Ómer Halısdemır ýnıversıtetinde ótken sımpozıým aıasynda Túrki áleminiń ózekti máselelerin qamtıtyn birneshe ǵylymı seksıalar uıymdastyrylyp, onda Túrkıa, Qazaqstan, Ázerbaıjan, Ózbekstan, Qyrǵyzstan, Túrikmenstan jáne basqa da elderdiń joǵary oqý oryndary men ǵylymı-zertteý mekemeleriniń ǵalymdary, zertteýshileri óz baıandamalaryn usyndy. Túrki memleketteri arasyndaǵy joǵary bilim salasyndaǵy yntymaqtastyqty basty taqyryp etken halyqaralyq jıynǵa Qazaq ulttyq qyzdar pedagogıkalyq ýnıversıteti resmı seriktes retinde qatysýda.
QyzPU rektory Gúlmıra Qanaı óz sózinde túrki halyqtarynyń ortaq tamyry men mádenı murasy, sonyń ishinde áıelderdiń bilim men ǵylymǵa qosqan úlesin zerttep, keleshek urpaqqa jetkizýdiń mańyzdylyǵyna toqtaldy.
Rektor Túrki elderindegi qyz balanyń bilim alý tarıhyna arnalǵan oqýlyq jazý jáne áıel ǵalymdar men aǵartýshylardyń murasyn biriktiretin «Túrki áıelderi ensıklopedıasyn» jaryqqa shyǵarý bastamasyn kóterdi.
«Ejelgi zamandardan bastap búgingi kúnge deıin túrki áıelderi bilim arqyly qoǵamǵa qyzmet etip keledi. Bul úrdis – ulttyń damýy men órkendeýiniń kepili. Bolashaqta da túrki elderi áıelderdiń bilim alýyna jaǵdaı jasap, olardyń áleýetin tolyq iske asyrýǵa kúsh salýymyz mańyzdy. Osy tusta Túrki elderi arasynda qyz balalardyń bilim alýyna qatysty tarıhı analızge negizdelgen oqýlyq jazýdy usynamyn. Sondaı-aq Túrki elderi arasynda áıel ǵalymdar men aǵartýshylardyń murasyn zerttep, nasıhattaý maqsatynda «Túrki elderiniń áıelder ensıklopedıasyn» úsh ýnıversıtet birge jazýdy usynamyn», – dedi Gúlmıra Ámirhanqyzy.
Ýnıversıtet rektory usynǵan jobalar Túrki álemindegi áıelderdiń tarıhı rólin júıeli túrde zertteýge, túrki qoǵamyndaǵy genderlik teńdik pen bilim berý salasyndaǵy jetistikterdi pash etýge baǵyttalǵan.
Aıta keteıik, Qyzdar ýnıversıteti – Ortalyq Azıadaǵy qyzdarǵa arnalǵan jalǵyz joǵary oqý orny. Bilim men mádenıet arqyly túrki halyqtaryn jaqyndastyrý baǵytynda atqarylyp jatqan bastamalarda ýnıversıtet belsendi seriktes retinde tanylyp keledi.