Oqýshylar saraıynyń Úlken konsert zalynda Uly Otan soǵysyndaǵy Jeńistiń 80 jyldyǵyna arnalǵan «Uly Jeńis: Erlikke taǵzym – urpaqqa úlgi» atty taǵylymy tereń merekelik konsert ótti.
K.Baıseıitova atyndaǵy daryndy balalarǵa arnalǵan respýblıkalyq mamandandyrylǵan mýzykalyq orta mektep-ınternatynyń basshylyǵy men oqýshylary ázirlegen mádenı is-shara Almaty qalasy ákimdiginiń qoldaýymen uıymdastyryldy.
Kesh qonaqtarynyń qatarynda Almaty qalasy ákiminiń orynbasary Ásem Núsipova, qalalyq máslıhat depýtattary, qoǵamdyq keńes músheleri, eńbek ardagerleri boldy. Kórermen qataryn oqytýshy-oqýshylar, sondaı-aq áleýmettik osal toptyń balalary tolyqtyrdy.
Konsert shymyldyǵyn halyqaralyq baıqaýlardyń laýreaty Bereke Enkebaeva ashty. Ol Jumaqan Seıilovtyń júrek tebirenter «Ana týraly ballada» ánin oryndap, kórermendi birden erekshe áserge bóledi. Sahnada án shyrqaǵan ónerpazdardy Vasılıı Ivanov pen Nıkıta Belákovtyń dırıjerlik etýimen mýzykalyq orta mektep-ınternatynyń úrmeli aspaptar orkestri súıemeldedi.
Merekelik keshte soǵys jáne soǵystan keıingi kezeńniń elge keńinen tanylǵan «Katúsha», «Smýglánka», «Temnaıa noch», «Jýravlı», «Sınıı platochek» syndy ánderi balalar hory men kásibı ártisterdiń oryndaýynda shyrqaldy. Konsert barysynda úlken ekrannan soǵys jyldaryndaǵy ómirdi beınelegen kórinister kórsetilip kesh mazmunyn keńeıtti.
Qazaqstannyń halyq ártisi, qazaq óneriniń prımasy Roza Rymbaevanyń sahnaǵa shyǵýy - keshtiń eń áserli sátteriniń biri boldy. Qarapaıym da júrekke jeter sózderimen kópshiliktiń kóńilin tolqytqan ánshi sahnadaǵy jarty ǵasyrlyq óner jolyna sholý jasady:
– Bul keshke erekshe kóńil-kúımen keldim. Men sahnada 50 jyl boıy án salyp kelemin. Osy ýaqyt ishinde meni árdaıym Álıa apamnyń rýhy qoldap kele jatqandaı sezinemin. Al án ónerindegi alǵashqy qadamym baıqaýlarǵa qatysýdan bastaldy. 1975 jyly Almatyda ótken Jeńistiń 30 jyldyǵyna arnalǵan patrıottyq ánder baıqaýynda «Sneg sedıny» ánin oryndap, laýreat atandym. Sol sát meniń úlken sahnaǵa jol ashqan alǵashqy jeńisim boldy. Mine, arada jarty ǵasyr ótse de, sol án meni osy kúnge deıin jetelep keledi. Búgingi kún – ardagerlerge taǵzym etetin, beıbit kúnniń qadirin sezinetin sát. Men elimniń erteńine, jas urpaqtyń jarqyn bolashaǵyna senemin, - dedi halyq súıiktisi.
Osy sózderden keıin Roza Qýanyshqyzy «Álıa», «Qazaq eli», «Erteńime senemin», «Sneg sedıny» syndy tyńdarmandardyń júreginen oryn alǵan ásem ánderin oryndady. Óner ıesiniń árbir áni – júrektiń úni, halyqtyń saǵynyshy, ýaqytpen úndesken áýen sekildi áser qaldyrdy.
Konsert sońynda Aleksandr Pahmýtova men Mıhaıl Lvovtyń «Poklonımsá velıkım tem godam» jáne Davıd Týhmanovtyń «Jeńis kúni» ánderi oryndalyp, barlyq qatysýshylar sahnada bas qosyp, bul keshtiń rýhyn bir arnaǵa toǵystyrdy. Odan keıin Almaty qalasy ákiminiń atynan yqylas gúli tabystaldy. Ónerpazdarǵa kórermender oryndarynan turyp, uzaq qol shapalaqtap qurmet kórsetti.
Qaırat BEGALIN,
Almaty qalasy Máslıhatynyń depýtaty:
Jeńistiń máńgilik máni– K.Báıseıitova atyndaǵy daryndy balalar mektebi oqýshylarynyń Jeńistiń 80 jyldyǵyna arnalǵan mazmundy, maǵynaly konsertin tamashaladyq. Uly Jeńis – ata-babalarymyzdyń qany men jany arqyly kelgen qasıetti uǵym. Osyndaı keshter jas urpaqtyń júregine elge degen súıispenshilik pen beıbit ómirdiń baǵasyn uıalatady. Bul – ótkenge taǵzym ǵana emes, keleshekke senimmen qaraýǵa jeteleıtin taǵylymdy sát. Búgingi kesh – tek óner merekesi ǵana emes, tarıhpen tildesken, júrekterdi biriktirgen, ótkenge taǵzym men bolashaqqa amanat júktegen rýhanı kesh boldy.