Bul turǵyda Bostandyq aýdanynda qandaı jumystar atqarylýda?
Múmkindigi shekteýli adamdardyń múgedektigi bar demesek, olar da - qoǵamnyń tolyqqandy múshesi. Olar da jaqsy ómir súrýge quqyly. Tórt qabyrǵaǵa qamalyp, úıde otyryp qalmaı, baratyn jerine esh kedergisiz, qolarbasymen de, súıengen taıaǵymen de emin-erkin kirip, shyǵýǵa tıis. Bul turǵyda shaharda qandaı jumystar atqarylýda?
Árıne, múmkindigi shekteýli azamattardyń qoǵamnan tys qalmaýyna sońǵy ýaqytta memleket tarapynan jiti kóńil bólinýde. Olar úshin aınalasynyń bári kedergisiz aımaqqa aınalýǵa tıis ekenin udaıy aıtyp keledi.
Keshe qalaǵa qarasty Bostandyq aýdany ákimdiginiń ókilderi múmkindigi shekteýli jandardyń qoǵamdyq birlestigimen birlesip, megapolıstegi áleýmettik nysandardyń múgedektigi bar adamdar úshin qanshalyqty qoljetimdi ekendigin tekserý úshin kóshpeli monıtorıń júrgizdi.
Jalpy, Bostandyq aýdanynda 8837 múmkindigi shekteýli jan turady. Bıyldan bastap qazirge deıin aýdanda turatyn múgedek azamattarǵa arnalǵan qoljetimdi ortanyń saqtalýy turǵysynan áleýmettik ınfraqurylym obektilerin túgendeýdi (pasporttaýdy) uıymdastyrý jáne júrgizý jónindegi jumys tobynyń múshelerimen birlese 533 nysan tolyqtaı beıimdeldi jáne 566 nysanǵa pasporttaý jumystary júrgizilgen.
Sonymen qatar, Bostandyq aýdanynda bıylǵa obektilerdi beıimdeý boıynsha – 30 nysan, pasporttaý boıynsha – 24 nysan jáne Amanat partıasynyń «Ózgerister joly: árkimge laıyqty ómir!» atty saılaýaldy baǵdarlamasyna sáıkes aýdannyń buryn ishinara beıimdelgen áleýmettik jáne kólik ınfraqurylymy obektilerine tolyq beıimdeýdi júrgizý turǵysynda 37 nysan bolyp bekitelgen.
Sol nysandardyń ishinde M.Maqataev atyndaǵy №140 mektep-gımnazıasy da bar. Bostandyq aýdanynyń áleýmettik salaǵa jaýapty mamandary, múmkindigi shekteýli jandardyń múddesin kózdeıtin qoǵamdyq birlestikter ókilderi kiretin monıtorıńtik top quramy osy bilim shańyraǵynda bolyp, nysannyń múgedek azamattarǵa qanshalyqty qoljetimdi ekenin tekserip kórdi.
Mektep-gımnazıanyń kireberisine «kómekke shaqyrý tetigi» qondyrylypty. Iaǵnı syrttan kelip turǵan qolarbadaǵy adam sol qońyraýdy basyp, ishtegi qyzmetkerge habar beredi de, ózi pandýs arqyly kóteriledi. Sondaı-aq, esik aýzynda kózi nashar kóretin nemese zaǵıp jandarǵa arnalyp Braıl áripteri bar taktıldi taqtaıshalar ornalastarylǵan. Kózi kórmeıtin adam taqtaıshany saýsaq izderimen basý arqyly qaıda baratynyn eshkimniń kómeginsiz bile alady. Aıaqtyń astyna tóselgen taktıldi temir plıtkalar da kórý qabileti nashar nemese zaǵıptardyń ǵımarat ishindegi qozǵalysyn jeńildeteri sózsiz. Aıtpaqshy, mektep ishinde qulaǵy estimeıtin balalar úshin arnaıy ınklúzıvti kabınet jabdyqtalǵan. Asqanada da erekshe balaqaılar úshin barlyq jaǵdaı jasalǵanyn kórdik.
Monıtorıńtik top bilim oshaǵynyń ájethanasyn da qarap shyqty. Ondaǵy qol jýǵyshtyń, ýnıtazdyń ornalasýyn qarady. Olardyń janyna taıaqty ilip nemese baldaqty bekitip qoıatyn ámbebap qaýipsizdik ustaǵyshy da bar eken. Mine, osy jaǵdaıdyń bári múmkindigi shekteýli azamattardyń ǵımaratqa eshkimge jaǵdaı aıtyp, birediń ýaqytyn almaı, eshkimniń kómeginsiz, ózi-aq kirip, shyǵýyna múmkindik beredi. Qoljetimdi nysan degen osy.
- Sarapshy pikiri
Ulan İŃKÁRBEK,
Bostandyq aýdany ákiminiń múgedek jandar máselesi jónindegi shtattan tys keńesshisi, aýdandyq «Múgedekter qoǵamy» qoǵamdyq birlestiginiń tóraǵasy:
– Biz búgin qaladaǵy eńseli mektepterdiń birin aralap shyqtyq. Múgedek adamdardyń kirip, shyǵýyna jasalǵan jaǵdaı jaman emes. Kóp dúnıe jasalǵany kórinip tur. Kózi kórmeıtin jandarǵa arnalyp ornatylǵan arnaıy taqtaıshalary durys. Degenmen, kireberistegi úlken dálizdiń ortasynda turǵan uzyn kolonnalarǵa zaǵıp adam basyn uryp almas úshin arnaıy belgi ornatyp qoıǵan durys bolar edi. Osy oraıda ájethanadaǵy eki kemshilikti atap keteıin. Ýnıtaz dál ortada ornalasqandyqtan, múgedek adamnyń qolarbasy janyna syımaıdy. Sondyqtan ony sol jaqqa, shetkerirek jyljytqan durys. Qońyraý tetigi joǵarylaý qondyrylypty. Eger adam ǵaıyptan qulap qalsa, kómek shaqyrý úshin tetikti basýǵa qoly jetpeı qalýy múmkin. Ájethana ishi keń eken, aınalyp, burylýǵa qolaıly, sonysy jaqsy eken. Jalpy, qaladaǵy nysandardyń múmkindigi shekteýli jandarǵa qoljetimdi bolýy maqsatynda jasalyp jatqan jumystarǵa oń degen baǵa berýge bolady. Biz kóshpeli monıtorıń jumysyn odan ári jalǵastyratyn bolamyz