Germanıanyń Gambýrg qalasynda qazaqstandyq kompozıtor Áıgerim Seılova óziniń aǵylshyn tilindegi opera mýltımedıasyn usynady
360 gradýstyq dybysqa negizdelgen jańa mánerdegi klasıkalyq mýzyka shyǵarmasynyń premerasy 2 jeltoqsan kúni ótedi, dep habarlaıdy Almaty-akshamy.kz
Ónersúıer qaýym jandy áýen men elektrondy dybystardyń úndestigine qanyǵyp, vırtýaldy mýzykalyq saıahatqa sapar shegedi. Aýqymdy ári áserli baǵdarlamany qurýǵa 25 halyqaralyq deńgeıdegi mýzyka maıtalmany jumyldyrylǵan. Ony júzege asyrýǵa eki jyldaı ýaqyt ketken.
«Bul 90 mınýttyq shyǵarma beıneınstalásıa negizinde qurylyp, solısik aspaptar, opera oryndaýshylary, shaǵyn kameralyq orkestrge arnalyp jazylǵan. Iaǵnı senografıany tolyǵymen vıdeo ártis almastyrady. Sondaı-aq elektrondy akýstıka áseri qoldanylady. Jandy dybyspen qatar, túrli sensor arqyly elektrondy dybystar qosylady», - kompozıtor Áıgerim Seılova.
Otandyq sazger týyndynyń tusaýkeserin el táýelsizdiginiń 30 jyldyǵyna oraılastyryp otyr. Mýzykant óz mýzykasy men óner tili arqyly Qazaqstan atyn tanytyp júrgenin maqtan etedi. Áıgerim Seılova – jeke aspaptar men kameralyq orkestrlerge arnalǵan 200-ge tarta shyǵarmanyń avtory. Onyń týyndylaryn álemniń úlken sahnalarynda úzdik mýzykanttar jarysa oryndap júr. Áıgerim – jyl saıyn tek bir ǵana álemniń úzdik kompozıtoryna buıyratyn Hındemıt syılyǵynyń ıegeri.