Qurǵaqshylyq pen ystyq
Germanıada kúnniń aptap ystyǵynan júgeri men kartop alqaptary zardap shegýde, dep habarlaıdy Almaty-akshamy.kz BAQ.KZ-ke silteme jasap.
Deutsche Welle saıty habarlaǵandaı, Germanıa fermerleri aýa temperatýrasynyń tym ystyq bolýy saldarynan qurǵaqshylyq oryn alyp, egistikteri kúıip kete me dep alańdaýly.
«Qurǵaqshylyq pen ystyq – bıylǵy jyly birqatar aımaqtarda problemaǵa aınalyp otyr», - dedi Nemis sharýashylyq odaǵynyń basshysy Ioahım Rýkvıd.
Aıtýynsha, aýa raıynyń ystyq bolýy astyq alqabyna aıtarlyqtaı áser etken.
- Egini jınalmaǵan kartop pen júgeri de joǵary temperatýradan zardap shegip otyr. Jaqyn arada jaýyn-shashyn bolmasa, úlken shyǵynǵa ushyraımyz, - dep atap ótti ol.
2018 jyly segiz federaldyq aımaqtaǵy germanıalyq fermerlerdiń jalpy shyǵyny 3 mlrd eýroǵa jetken. Rýkvıd sol ýaqytta el úkimeti men federaldyq jer ıelerinen zardap shekken aımaqtarda aýyl sharýashylyǵy sektorynyń ókilderine alǵashqy kómek kórsetip, jaǵdaıdy túsindirýdi suraǵan bolatyn.
Nemis meteorologıalyq qyzmetiniń derekterine sáıkes, osy aptada oryn alady dep kútilip otyrǵan aýa raıy 40 gradýsqa jetýi múmkin.