General bolam deseńiz...

General-maıor Bolat Eltaıuly Shaımanov 6 tamyz, 1953 jyl, Aqtóbe oblysy Oktábr aýdany Dımıtrovka kentinde dúnıege kelgen.

• Qaraǵandy polıtehnıkalyq ınstıtýtynyńavtomehanıka fakúltetin bitirgen (1976), avtomobıl kóliginiń ınjener-mehanıgi.


• 1976 jyldan - «Aqtóbeaýyrqurylys» birlestiginde aga mehanık, avtokolonna bastygy;


• QazKSR (QR) MQK-UQK organdarynda qyzmette.


• 1998 jyldan - Atyraý oblysy UQKD bastyǵy.


• 1999 jyldan - Aqtóbe oblysyUQKD bastyǵy.


• 2000 jyldan - QR UQK tóraǵasynyń orynbasary.


• 2001 jyldan - Aqtóbe oblysy UQKD bastyǵy.


• 2006 jyldan beri - Mańǵystaý oblysyUQKD bastyǵy.


• 2011 jyldan bastap qurmetti eńbek demalysynda


• Búgingi tańda «Bereket» Halyqaralyq ámbebap taýar bırjasynyń Tóraǵasy, «Atameken» Ulttyq kásipkerler palatasynyń  múshesi, QR UQK Ortalyq ardagerler keńesi Tóralqasynyń múshesi, QR UQK –niń qurmetti qyzmetkeri.


• İİ dárejeli «Dańq» ordeniniń ıegeri. «QR ekonımıkasynyń maqtanyshy» ordenimen, Qazaqstan Respýblıkasy Qurmet gramotasymen jáne basqa da 30 medalmen maparapattalǵan.

General bolam deseńiz: bilýge tıis bes ınsaıt

Kóziqaraqty oqyrman, Hákim Abaı «Bir ǵalymdy kórseńiz. Ondaı bolmaq  bolmaq qaıda dep, Aıtpa ǵylym súıseńiz» degen eken. Otan qorǵaý salasyn tańdaǵan azamattar úshin búgingi maqalamyz mamandyqtyń taǵy bir qyryn ashyp qana qoımaı, jetistikke jeter joldy nusqap kórsetedi dep úmittenemiz. Sol jetispegen besinshi elementti taýyp, keı syrbermes qulyptardyń kiltin tabar degen oıdamyz. Óıtkeni, keıipkerimiz oıdan shyǵarylǵan tulǵa emes, kezinde myńdaǵan qatarlastary sekildi áskerı salany tańdaǵan adam. Qyzmettiń qıynshylyǵyna shydap, taǵdyrdyń tepkisine tóze bilgen. Mańdaı terin tóge júrip, jarty joldan burylmaı ózine jáne aınalasyna kásibıligin tańyta bilgen jáne tanytyp ta júrgen jan. Jetistikke jetken jandardyń ómirimen tanysa otyryp, biz kóptegen detaldardy qaperimizge almaımyz, «e solaı eken» dep jyly jaba salamyz. Shyn máninde ár oqıǵada támsil bar jáne ár adam ómirdegi ustaz.

Sonymen, keıipkerimizben tanysý sáti tústi. General Bolat Eltaıuly Shaımanov BAQ-ta kóp shyǵa bermeıtin tulǵa. Dabyra kóp sózdi unata bermeıtinin de birden baıqaýǵa bolady. Biz kezdespes buryn, telefon arqyly az-kem sóılestik. Ýaqyt pen kezdesý ornyn anyqtadyq. Bizden suraqtar tizimin aldyn ala surady. Biz standartty onǵa jýyq suraq tizimin jibergen bolatynbyz. Alaıda, keıipkerimiz bizdiń aldyn ala bergen suraqtarǵa daıyndalyp kelip, sol saýaldarymyz tóńireginde áńgime-dúken quryp otyrýdyń ornyna burynǵy shyqqan jazba eńbekterin alyp keldi de bizben tanystyrdy. Qyrandaı qyraǵy, suńqardaı suńǵyla kózderimen bir súzgiden ótkizip: «Taǵy qandaı saýaldaryn bar?»,-dep ózimizge qarata synı suraǵyn qoıdy. Ortańqol jýrnalıs úshin árıne taptyrmas keıipker, barlyq jaýapty daıyn kúıde alyp keledi. Maqalanyń 90 paıyzy daıyn túrde tur deı berseń bolǵany. Shaınap berdi tek juta sal. Keıipkerimizdiń ıntelektýaldy deńgeıin sol kezde uqtyq. Talaı jyldary tyńshylardy, jasyrynǵan jaýlardy, lańkester men qylmyskerlerdi qolǵa túsirgen kásibı komıtechık ýaqytyn zaıa ketirgisi kelmedi. Standartty jýrnalıs úshin daıyn jaýaptardy alyp aldyna usyndy da,  «Taǵy qandaı saýlyń bar?», bolmasa bir-birimizdiń ýaqytymyzdy zaıa ketirmeıik degenge saıady. Mundaı kelgen múmkindikten aıyrylyp qalý jýrnalıs mamandyǵymyzǵa syn. Sondyqtan standartty 90 paıyzdy syrtqa ysyryp qaıyp, suhbat berýshiniń (kim ekeni qysqasha anyqtamada barlyǵy jazylǵan) aıtpaǵan 10 paıyzyn alý maqsatyna kiristik. Sonymen suhbat barysynda biz úshin bes ınsaıt ashyldy. Nege bes? Sımvolıkalyq san. Óıtkeni, keıipkerimiz oblystyq departamentterdi bes márte basqarǵan, sonymen qatar Abaı atamyz «bes nársege asyq bol» dep aıtty emes pe?.. General bolam nemese basqa da salada jetistikke jetemin deseńiz, onda general B. Shaımanovtyń ómirinen alynǵan bes ınsaıtqa nazar aýdaryńyz.

Tamyryndy bil, tarıhyndy tany

 Adam balasy ózinen ózi bul dúnıege kelgen joq. Ony jaratqan kúsh bary haq. Sondaı-aq, ol atadan balaǵa jalǵasyp kele jatqan urpaqtar sabaqtastyǵynyń bir bóligi. Er azamatqa óz tamyryn, eldiń tarıhyn bilgen jón. Sondyqtan bolar, qazaqtar ata-baba esimin uran qylyp jaýǵa shapqan, tilge tıek etip sóz bastaǵan, jyr arnaǵan. Jeti atasyn jatqa bilgen. Tamyrynan aıyrylǵan adam, tarıhynan aıyrylǵan el ónbeıdi.  Ata-baba árýaǵy men urpaqtarynyń arasynda bir kózge kórinbes baılanys bar.  Er azamat muny erte uqqan saıyn joly da ashyla túsedi. Keıipkerimiz eń aldymen óziniń Sataı qajy babasy týraly sóz qozǵady. Onyń aıtýynsha, Sataı qajy Kúzembaıúly 1790 jyly Aqtóbe oblysy, Temir aýdany Altyqyrasý aýylyndaǵy Qumdy degen jerde dúnıege kelgen. Sulý jarymen 2 uly, 1 qyzy bolǵan. Sol aımaqta aǵash egip, bulaq kózin ashyp, balyq, egin sharýashylyqpen aınalysyp, bútin bir áýletti qamtamasyz etti. Óz rýynyń basshysy bolǵan. Imany berik, dinge adal áýlıelik qasıeti bar adam bolǵan. Ákesi Kúzembaı túsine kirip, qajylyqqa attaný qajettigi týraly aıan beredi. Úlken uly Qalmaǵanbetti ertip, ekinshi uly Shaımandy rý basshysy retinde qaldyryp, ózi ekinshi ret qajylyqqa attanyp ketedi. Mekkege jetken soń úsh kún boıy syrqattanyp sol jerde kóz jumady.

• Búgingi kúni babamyzdyń múrdesi sonda (Qasıetti Mekke qalasynda). 2013 jyly baryp, qajylyq etip, týǵan jerdiń topyraǵyn babamyzdyń basyna apardym. Sataı babamyz qandaı qasıetti, ımany berik kisi bolǵan. Ekinshi ret qajylyqqa attandy. Týǵan jerdi artqa qaldyryp alpys segiz jasynda, Qudaıdyń jolyna tústi. Urpaqtaryna duǵa jasady. Babamyzdyń basyn tabý úshin men de tazarý jolyna túsip, ózime úlken rýhanı azyq aldym. Men babalarymnyń qoldaýyn ishteı sezemin. General ataný bul tek meniń jetistigim emes, Sataı babamyzdyń urpaqtaryna tilegen duǵasynyń sharapaty dep bilemin,-deıdi Bolat Eltaıuly.

Ol Mekke men Mádınaǵa barmas buryn, úlkenderdiń keńesimen Arystan bab, Qoja Ahmet Iassaýı, Pir Beket áýlıelerdiń basyna baryp, quran baǵyshtady. 

Tarıh demekshi, Bolat Eltaıuly  tarıh jaıynda aıtqany da bizdi tánti etti. Eń alǵashqy bolyp, ol Alashorda qaıratkerleri týraly sóz qozǵady.

• Tarıhymyzdy, dástúrimizdi bilgen jón. Ata-babmyz bizge osyndaı keń-baıtaq jerimizdi amanat etip qaldyrdy. Alash kósemderi: Álıhan Bókeıhanov, Ahmet Baıtursynov, Mirjaqyp Dýlatov jáne taǵy basqa sol kezdegi alashordalyqtardyń árýaqtarynyń aldynda bas ıemin. Olar jerimizdi, elimizdi saqtaý úshin eren eńbek jasady. Kremlde Stalın men Lenınniń aldynda qazaq ultynyń múddesin qorǵady. Bolashaqta atylyp ketetinin bildi. Soǵan qaramastan el múddesin aldyńǵy qatarǵa qoıdy. Keıinde, Jumabek Táshenov atamyz Nıkıta Hrýshevtiń aldynda sóz sóılep, qazaq jeriniń bólinýine ashyq qarsy shyqty. Batyrlyq pa? Batyrlyq.

Bizdiń býyn toqsanynshy jyldary ulttyq qaýisizdikti qamtamysyz etti. Qıyn-qystaý kez edi. 1991 jyldan – 1995 jylǵa deıin tipti qıyn boldy. El ishinde, bazbuzarlar qaptady, bandıtızm beleń aldy. Qyzmetkerlerdiń jartysy ózderiniń tarıhı Otandaryna kóship ketti. Aramyzdaǵy biren-saran adam aqsha joq dep, qyzmetten ketti. Sonda sanaýly qurammen el ıgiligin talan-tarajǵa salýǵa jol bermeı, anyǵynda kúrestik. Aqyry, bedeli myqty, aty dardaı QR Ulttyq qaýipsizdik komıteti ispetti uıymdy qaldyryp, kelesi býynǵa tabys ettik. Endigi býynnyń mindeti arnaıy organdy sol mejege kóterý, - deıdi ol.

Bir baıqaǵanymyz general B. Shaımanov tarıhqa keshegi keńestik turǵydan emes, búgingi táýelsiz eldiń turǵysynan qaraıdy.

Sonymen, keıipkerimizdiń ómir joly dáleldep turǵandaı, adam jetistikke jetý úshin eń birinshi kim ekenin, kimnen taraıtynyn, ata-balalary kim ekenin bilgeni abzal. Tarıhyn jáne shyqqan tegin bilgeni jón. Bul qazaqta qanymen birilgen genetıkalyq kod. Túgeldeı bir ulttyń, sonyń ishinde jekelegen azamattyń temirqazyǵy.

Qıyndyqtan, qatelikterden qoryqpa!

 Sonymen keıipkerimizdiń ómirine tam-tumdap boılap kelesi derektermen tanys boldyq. 1970 jyly №28 orys mektebin bitirip, ákesi Eltaı Sataevtyń nusqaýymen Kólik jóndeý zaýytynda avtoslesar bolyp eńbek jolyn bastaıdy.  Qara jumysqa jegilip, erinbeı eńbek etedi. Bir jyl ishinde 3 razrádqa kóteriledi. Qosymsha bilim alý maqsatynda Aqtóbe pedagogıkalyq ınstıtýttyń keshki kýrstaryna baryp júrdi. Komsomol uıymyna basshylyq jasady. Araǵa bir jyl salyp, Qaraǵandy  polıtehnıkalyq ınstıtýttyń stýdenti atandy. Árıne, alystan kelgen jas talapkerdi eshkim qushaq jaıa kútip turmady. Alǵashqy kúnin temirjol beketinde túnegen, keıin úmitkerler arasynda eń joǵary kórsetkish kórsetip oqý ornyna qabyldanady. Tipti, úlgerimi jaqsy stýdentti Máskeýge jibergisi keldi. Ákesi Eltaı Shaımanulynyń aqylymen elinde qalady. Kúndiz ınstıtýtta bilim alsa, keshkilik tehnıkalyq ýchılıshesinde «kombaıner» mamandyǵy boıynsha biliktiligin artyrǵan. Jazǵy praktıkada kóp kólemdi ónim jınap, jastardy biriktirgeni úshin «Erekshe eńbegi úshin» medalimen marapatalǵan.

• Kombaıyn júrgizip, egin orý úlken eńbek. Ol kúnderdi umytpaımyn. Jıyrma jasymda alǵan medaldiń men úshin orny erekshe. Óıtkeni, ony kúni-túni júrip aldym. Sondaı-aq. «Dańq» ordeni men úshin ystyq. 1976 jyly elime oraldym. Joǵary oqý ornyn aıaqtaǵan soń Aqtóbedegi «GlavZapadStroı» mekemesiniń kólikkombınatyna jumysqa ornalastym. Qatardaǵy mehannıkten bastap, aǵa mehannık, al 1,5 jyldyń ishinde avtotizbek basshysy bolyp saılandym. 1979 jyly mekeme ujymynyń qoldaýymen Keńes úkimeti memlekettik qaýipsizdik komıtetine jiberildim. Óz basym bul qyzmetke talpynǵan joqpyn. Ujym usyndy, kórsetkishterim jaqsy boldy. B. Baıjigitov esimdi kýratorym, keıinde aqylshy aǵam: «Bolat sendeı azamattar bizge kerek. Otanǵa kerek» dep túsindirdi. Ol kezde memlekettik qaýipsizdik organdaryna ilý de bir adam ótetin. Olardy saýsaqpen sanaýǵa bolar edi. 52 úmitkerdiń ishinen  meniń kandıdatýram Aqtóbe oblysy boıynsha jalǵyz ótti. Sonda ákem Eltaı, Uly Otan soǵysynyń ardageri maǵan «Bul jaýapkershiligi mol qyzmet. Osy joldy tańdadyń ba, jaltaqtama, Sońyna deıin jetkiz»,- dep óz aqylyn aıtty. Men kelisken soń, qyzmetimen adaldyq tanyttym. Almaty,Tashkentte, Máskeýdegi MQK Joǵary mektebin oqydym. Árıne, qıynshylyqtar bolady. Otan qorǵaý mamandyǵyn tańdaǵan ekensiń, ony sońyna deıin jetkiz.


• «Er jigitten ne paıda?

            Qolyn qarý almasa.

             Elin, jerin, týǵanyn,

             Dushpannan saqtap qalmasa» , -deıtin halyq naqyly ómirlik ustanymǵa aınalýy tıis. Qatelikter de  bolady. Soǵan qaramastan, barlyǵyn oı elegine salyp, esepteýge tıissiń. Qatelik ketken kúnniń ózinde jaǵdaıdan jeńimpaz bolyp shyǵyp, qaıta qyzmetińdi jetildirgen jón. Keıin joǵary laýazymdarǵa usynar kezde qyzmet ornyn tańdaǵan joqpyn. Basshylyq qandaı buıryq berdi, Otan Ana qaıda jiberdi sonda baryp qyzmet atqaratynmyn. Aýdanǵa bardym, bes márte oblystyq departamentiń tizginin ustadym. Qıynshylyqtan qashqan emespin. Kóbisi, qalaı general atandyń dep súraıdy. Meniń jaýabym, qıynshylyqtardan qashpadym, qatelikterimnen sabaq aldym, ońaı jol izdegenim joq,-dep aıtty general B. Shaımanov.

«Bolat qaınaýda, jigit maıdanda shynyǵady» degen osy. Otan qorǵaýshy mamandyǵyn tańdaǵan ekensiń, ómirdiń soqqysyna, taǵdyrdyń tepkisine tóze bilgen jón. Synaqtar men qıynshylyqtar er azamatty qamshylaıdy, tulǵa retinde ósiredi. Muny biz keıipkerimizdiń ómir jolynan kórip otyrmyz.

Taza hám táýelsiz bolý

Bolat aǵa Shaımanovtyń aıtýynsha, búgingi zamannyń qundylyqtary ózgergen. Telearnalar men áleýmettik jeliler baı ári jetistikke jetken adamdardy dáriptep, qoǵamda ózindik obraz qalyptastyrady. Dúnıe, aqsha, múlik keńinen dáripteledi. Arnaıy organ qyzmetkerleri, jalpy áskerı adam qarapaıym ári laıyqty ómir súrý kerek. Ol úshin rýhanı taza, qoǵamdyq pikirden táýelsiz tulǵa bolǵany abzal. «Joǵaryda aıtqandaı, ákem maǵan jaltaqtama dep aqyl keńesin aıtqan demek, eshnársege alańdamaı elge qyzmet etý degen sóz. Búgingi jastarǵa aıtarym, ózderińdi azamattyq ómirde tabys taýyp júrgen azamattarmen salystyrmańdar. Sizder baı bolý úshin Otan qorǵaý jolyn tańdaǵan joqsyzdar. Sizder eldi qorǵaý úshin, ulttyq qaýipsizdikti qamtamasyz etý úshin osy joldy  tańdadyńyzdar. Basqaǵa jaltaqtadyń eken, ózińdi bireýmen salystyrdyń eken, negizgi joldan taıasyń. Materıaldyq qundylyq emes, rýhanı qundylyq, ar tazalyǵy birinshi orynda turý kerek. Árıne, zaman basqa nárseni meńzeıdi. Solaı desek te, Otan qorǵaýshyǵa eliniń, urpaǵynyń amanaty senip tapsyrylǵan. Qyzmet barysynda ár túrli jaǵdaı bolady. Paraǵa, satqyndyqqa jolamaý kerek. Joladyń ba, saǵan bul organda oryn joq. Laıyqty emessiń. Óz basym birde bir ret para alǵan emespin. El aldynda júzim jarqyn dep qaımyqpaı aıta alamyn. Men ustaǵan qylmysker, 100 paıyz kinási dáleldenip temir tordyń arǵy jaǵyna toǵytylatyn. Qandaı da bir usynystar, «aqylshylar» tabylatyn. Táýelsiz óz oıym boldy. Basshylyqqa zańdy aldym. Óıtkeni, arym taza boldy. Jastar da osy ustanymydy ustasa deımin. Sonda elimiz órkendeıdi».

İshki tazalyq, táýelsiz kózqarasty qalyptastyrady. Táýelsiz tulǵa – kúshti tulǵa. Ol qıynshylyqtardy ótip, maqsatyna jetedi.

İzdenimpazdyq pen básekege qabilettilik

Áńgimelesý barysynda taǵy bir nárseni uqtyq. Keıipkerimiz zamanmen birge adym basyp keledi. Jasy jetpiske jaqyndap qalsa da, oıy utqyr. Basynda tarıh pen tekti túgendedik, ishki tazalyqty tarazyladyq, endi damý men básekege sóz kezegi keldi.

• Biz kóbinese ótken tarıhpen maqtanamyz. Onysy durys, ótkensiz bolashaq bolmaıdy. Solaı desek te, bolashaqty da oılaǵanymyz jón. Kóshpendiler nege jarty álemdi jaýlady? Sebebi, olar soǵysta atty áskerdi paıdalandy. Basqa halyqtarda joq ádisti, tehnologıalardy qoldandy. Endi, ol zaman ótti. Ata-babamyz isterin istep ketti. Biz de batyr babalarymyzǵa laıyqty bolýymyz kerek. Men óz basym 30 elde boldym. Búgingi kúnniń aty (tulpary) ol – jańa tehnologıalar. Jasandy ıntelekt, sıfrlandyrý, IT tehnologıalar. Biz endi osylardy tizgindeýimiz kerek. Tizgindep yrqymyzǵa kóndirsek, damyǵan elderdiń qatarynda bolamyz.  Búgingi geosaıası jaǵdaı kórsetti, tehnologıasy kenje qalǵan, damymaǵan el soǵysta jeńe almaıdy. Bizdiń jastar, sonyń ishinde arnaıy organdar qyzmetkerleri álemniń ozyq tehnologıalaryn meńgerip, kúndelikti qoldanysqa engizý kerek. Ol úshin izdengen jón. Álem aǵylshyn tilinde sóıleıdi. Aǵylshyn tilin úırengen adamdardyń aldynda búkil ǵylym ashylady. Buryn biz jappaı orys tilin úırenýshi edik, endi aǵylshyn tilin úırený kerek. Áskerı  Jarǵy tártipke shaqyrady. Tártip arqyly ózindi-ózin tárbıeleý, jónge keltirýge qol jetkizesiń. Sol arqyly jańa dúnıelerdi úırenesin. Tek Jarǵy jattap, qaǵazdy saýatty jazyp jetistikke jete almaısyń. Ol zaman ótip jatyr. Endigi kezek izdenip, ózińdi qamshylap, nátıjege qol jetkizý. Adamnyń sózi men isi qabysqan jón. Jumysty praktıka júzinde kórsetken durys. Qur sózben eshteńe óńbeıdi. Tek qajyrly eńbek adamdy jetistike jetkizedi. Sondyqtan, búgingi áskerı qyzmetshilerdi zamannan qalmaı, álemdik  básekege qabiletti bolýǵa shaqyramyn,-dep oıyn jetkizdi Bolat Eltaıuly.

Qoǵamǵa paıdaly bolý jáne mádenıettilik

Osylaısha, biz áńgimelesý barysynda besinshi ınsaıtqa da jettik. Aıbaı ǵalymǵa arqa súıeıtin Alash jurty emespiz be? Hákim «Teginde adam balasy - adam balasynan aqyl, ǵylym, ar, minez degen nárselermen ozbaq» dep beker aıtpasa kerek. Keıipkerimizdiń bastapqy oıy, Er Báýkeń – Baýyrjan Momyshulymen ushtasyp jatsa, suhbatymyzdyń qorytyndysy Abaıǵa aınalyp keldi. Otan qorǵaýshy mamandyǵyn tańdaǵan azamat mádenıetiligimen, ónerimen elge úlgi bolǵany jón. Bul turǵydan kelgende Bolat Eltaıulynyń qosary mol.

• Adam bir salamen shektelmeı, jan-jaqty bolǵany jón. Bul arnaıy organ qyzmetkerlerine de qatysty. Ózim qolym bos kezde Muqaǵalı Maqataevty, Muhtar Shahanovty, Muhtar Áýezovty oqımyn. İlıas Esenberlınniń «Kóshpendilerin» janym súıedi. Bos ýaqytta dombyra, gıtara tartamyn. Qaı jerde qyzmet atqarmasam da, elmen, onyń ishindegi qoǵamnyń ozyq oıly azamatarymen, zıaly qaýymmen etene aralastym. «Ortaǵa bilimmen emes, minezińmen, ónerińmen sıasyn» degendeı, halyqpen birge boldym. Kez kelgen jerde keleli áńgime, jóni túzý sóz aıtsań, qolyńa qazaqtyń qara dombyrasyn alyp án shyrqasań, bedeliń kóterilmeıdi me. Tek ózińdi emes, búkil organnyń abyroıyn kóterýge úlesińdi qosasyń. Eki nemeremdi dombyraǵa berdim. Olar babasyna arnalyp shyǵarylǵan «Sataı baba» kúıin jatqa oryndaıdy. Joǵary mádenıet, tálim-tárbıe bolý qajet. Patrıotsyń ba, ispen dálelde. Óziń de úıren, balalaryńa da laıyqty tárbıe ber. Erteńgi kúni «meniń ákem mynandaı, meniń atam mynandaı keremet adam boldy» dep esine túsiredi. Artyńan iziń qalady, - deıdi keıipkerimiz.

Sondaı-aq, Japonıaǵa barǵanda ulttyq tárbıelerine tánti bolǵanyn tilge tıek etti. Ol jerde alǵashqy bolyp, ana tilderin úıretedi eken. Ulttyq mádenıetti damytatyny ony tánti etken.

• 58 jasymda qurmetti eńbek demalysyma shyqtym. Taǵy bes jyl Máskeýde qyzmet etýdi usyndy. Alaıda, bas tarttym. Óıtkeni, 32 jylymdy Otanǵa qyzmetke berdim. Endi zeınette ózimdi basqa qyrynan ashqym keldi. Adam bir ornynda otyrmaý kerek. Qyzmetten keıin de ómir bar. Barynsha qoǵamǵa paıdaly bolýdy oıladym. Zeınetke shyqqanda mende materıaldyq qor bolmady. Sondyqtan, barlyǵyn nólden bastaý kerek boldy. Ózime jańa kásipti alyp, jumysqa belseńe kiristim. Úıdegi dıvanda otyra berseń, qoǵamǵa paıdasyz bolasyń, eshkimge keregiń bolmaıdy. Adam sodan aýrýshań bolady. Qyzmettegi jigitterge aıtarym, qyzmetten keıin de ómir bar. Eńbek demalysyna shyqqannan keıin de, óz joldaryńdy tabyńdar. Zeınetaqym jetedi, balalarym asyraıdy degen qate uǵym. Kerisinshe, men balalarǵa kómektesem, aınalama kómektesemin dep baryńdy da naryńdy da ómirlik alamanǵa salyńyzdar. Burynǵy Alash qaıratkerleri sekildi elge qyzmet etińizder. Óz basym jańa tehnolgıalardy zertteýge kiristim. Jasym jetpiske kelse de, jastardan qalyspaımyn dep ózime beıtanys salany úırenýge kiristim. Eń bastysy densaýlyqtaryńyz bolsa, qalǵany tabylady, - dep óz oıyn qorytyndylady bizdiń búgingi keıipker.

Qundylyqtar aýysqan zamanda jıyrmasynda mıllıonner, otyzynda mınıstr bolǵandar keńinen dáriptelip jatady. Shyn máninde mańdaı terin tókken adam, Otanǵa baryn bergen adam baqyttyń kiltin tabar. Búgingi keıipkerimiz general Bolat Shaımanov jınaǵan tájirıbesimen bóliskeni saptaǵy azamatar úshin taptyrmas tálim. «Jaqsynyń jaqsylyǵyn aıt, nury tasysyń» demekshi, biz keńinen ashpaǵan keıipkerimizdiń taǵy bir qyry ol onyń márttigi. Kásibiniń belgili bóligin muqtaj jandar men qoǵamdyq uıymdarǵa tapsyrady. UQK Aradgerler uıymyna kórsetetin kómegi bólek taqyryp.  Keıipkerimizdiń suraýy boıynsha ol taqyrypty ashyp jazbadyq.  Asqaraly alpystyń aýylynan qyr asyp, kemeldengen jetpis jasqa kelgeli turǵan Bolat Eltaıulyn ataýly merekesimen shyn júrekten quttyqtaımyz. Zor densaýlyq, uzaq ómir, otbasylyq baqyt, qajymas qaırat, talmas qanat, el ıgiligi jolyndaǵy eńbegine zor tabys tileımiz.

Áńgimelesken áskerı tilshi Daryn SEIİTOV