Genderlik teńdik Ortalyq Azıada qandaı jaǵdaıda
Qazaqstan Syrtqy ister mınıstrliginiń qoldaýymen «BUU-áıelder» qurylymy «Beıjińnen Parıjge deıin: Ortalyq Azıada mindettemelerdi is-qımyldarǵa aınaldyrý» atty Beıjiń deklarasıasy qabyldanǵannan beri 25 jyl ótkennen keıingi ýaqytta áıelderdiń jaǵdaıyna qatysty ózekti máselelerdi talqylaý úshin óńirdegi elderdiń azamattyq qoǵam ókilderiniń kezdesýin uıymdastyrdy, dep habarlaıdy Almaty-akshamy.kz QR SİM taratqan habarǵa silteme jasap.
Belgili otandyq dıplomat Mádına Jarbosynovanyń tóraǵalyǵymen ótken kezdesýge 1995 jyly Áıelder jaǵdaıy jónindegi tórtinshi dúnıejúzilik konferensıaǵa qatysqan Qazaqstan, Qyrǵyzstan, Tájikstan, Túrkimenstan jáne Ózbekstan ókilderi, sondaı-aq ár túrli urpaqtyń azamattyq qoǵam belsendileri qatysty. Qatysýshylar Beıjińdegi sol kezdesýde qol jetkizilgen ýaǵdalastyqtar álemdegi jáne Ortalyq Azıa óńirindegi áıelderdiń jaǵdaıyn jaqsy jaqqa qalaı ózgertkeni, sondaı-aq genderlik tepe-teńdikti shyn-máninde qamtamasyz etý jáne áıelder men qyzdardyń quqyqtary men múmkindikterin keńeıtý úshin úkimetter men azamattyq qoǵamǵa taǵy ne isteý qajettigi, osy maqsattarǵa qol jetkizý úshin qandaı salalarda ózgerister engizý kerektigi jóninde óz pikirlerimen bólisti.
İs-sharada Eýropa jáne Ortalyq Azıa elderi boıynsha «BUU-áıelder» qurylymynyń Óńirlik dırektory Álıa ál-Ásır quttyqtaý sóz sóıledi. Onyń aıtýynsha, «genderlik teńdik salasyndaǵy progresti jedeldetý qajet jáne ókilettiktiń teń berilýin qamtamasyz etý, áıelderdiń belsendiligine kepildik berý jáne ómirdiń barlyq salasynda áıelderdi shekteıtin qurylymdyq kedergiler men kemsitýshilik normalardan arylý mańyzdy».
Kelesi aptada Parıjde «Teńdik urpaǵy» jahandyq forýmy ótedi. Onda úkimetter men azamattyq qoǵamdar ózderiniń bastamalary men basymdyqtaryn jahandyq deńgeıde usyna alatyn bolady.
«Biz Qazaqstan úkimetiniń, atap aıtqanda, Syrtqy ister mınıstrliginiń genderlik teńdik máseleleri boıynsha bilim men tájirıbedegi olqylyqtardyń ornyn toltyrýdyń neǵurlym qolaıly jáne tıimdi jolyn izdestirý jónindegi birlesken kúsh-jigerdegi qoldaýyn joǵary baǵalaımyz», – dep atap ótti Álıa ál-Ásır.
30 maýsym men 2 shilde aralyǵynda «BUU-áıelder» qurylymynyń jáne Fransıa úkimetiniń qamqorlyǵymen aldaǵy bes jylda genderlik teńdik jolynda progreske qol jetkizý úshin birqatar naqty mindettemelerdi qamtamasyz etýge baǵyttalǵan genderlik teńdik máselelerine arnalǵan jahandyq is-shara bolyp tabylatyn «Teńdik urpaǵy» forýmy ótedi.
