Túrkistan oblysynda Almaty – Shymkent tasjolynyń 667-shaqyrymynda toı korteji júrgizýshileri jol erejesin óreskel buzǵany úshin jaýapqa tartyldy, dep habarlaıdy Aqshamnews.kz Polisia.kz deregine silteme jasap.
Polısıa ınternet-resýrstardy monıtorıńteý kezinde birneshe toı kóliginiń júrgizýshileri jolda "jylan jolyn" jasap júrip, ózge kólik qozǵalysyna kedergi keltirgenin anyqtaǵan. Barlyq quqyqbuzýshylar birdeı anyqtalyp, ákimshilik jaýapkershilikke tartyldy, al olardyń kólikteri arnaıy turaqqa qoıyldy. İs-shara uıymdastyrýshysyna profılaktıkalyq túsindirý jumysy júrgizildi.
Buǵan deıin de merekelik kortejderdiń qatysýymen túrli quqyqbuzýshylyqtar tirkelgeni habarlanǵan. Máselen, Ekibastuzda 6 avtokólikten quralǵan toı kortejine qatysty túrli baptar boıynsha 15 ákimshilik hattama toltyrylǵan.
Al Shymkentte túnde tasjolda qarsy baǵytqa shyǵý, artqa júrip qozǵalý, terezeden eńkeıý sekildi qaýipti áreketter jasaǵandar da jazalanǵan. Sondaı-aq oqý jylynyń sońynda BAKAD trassasynda bitirýshi túlekterdiń korteji jol qozǵalysyn buzyp, apattyq jaǵdaı týdyrǵany úshin polısıa nazaryna ilikken edi.
Polısıa qoǵamdyq tártip pen jol qaýipsizdigin saqtaýdy, kortej kezinde de jol júrý erejelerin qatań oryndaýdy eskertedi.