Almatyda qurylys-montaj jumystarynyń barysy, kóriktendirý jáne áleýmettik mańyzy bar taýarlar baǵasyn baqylaý máseleleri qaraldy, - dep habarlaıdy Aqshamnews.kz tilshisi.
Qala ákimi Darhan Satybaldynyń tóraǵalyǵymen qala qyzmetteri men basqarma basshylary qatysqan keńes ótti. Onda qurylys-montaj jumystaryn júzege asyrý, abattandyrýdy qalpyna keltirý jáne áleýmettik mańyzy bar azyq-túlik taýarlar baǵasynyń turaqtylyǵyn qamtamasyz etý máseleleri talqylandy.
Ekonomıka jáne qarjy basqarmasynyń dereginshe, 2025 jyldyń basynan beri Almatynyń jergilikti búdjetiniń kiris bóligi 1,6 trln teńgege jetip, jyldyq jospardyń 87,4% oryndaldy. Bul kórsetkish megapolıstiń ekonomıkalyq ósiminiń turaqty qarqynyn jáne búdjet saıasatynyń tıimdi iske asyrylyp jatqanyn kórsetedi. Qarajat ınjenerlik jeliler, áleýmettik nysandar qurylysy men qoǵamdyq keńistikterdi abattandyrýdy qamtıtyn 600-den astam ınfraqurylymdyq jobalardy júzege asyrýǵa jumsalyp otyr.
Darhan Satybaldy áleýmettik mańyzy bar azyq-túlik taýarlary baǵasyna monıtorıńti kúsheıtýdi jáne qalanyń azyq-túlik naryǵyndaǵy jaǵdaıdy baqylaý úshin vedomstvoaralyq jumys tobyn qurýdy tapsyrdy. Ol baǵa turaqtylyǵy turǵyndardyń ómir sapasyna tikeleı áser etetinin atap, bul baǵyttaǵy jumysty júıeli jáne turaqty júrgizý qajettigin aıtty.
Keńes barysynda «Almaty Sý» memlekettik komýnaldyq kásiporny jer qazý jumysy júrgizilgen aýmaqtardy qalpyna keltirý týraly esep berdi. Jyl basynan beri qalada 2,5 myńnan astam qazý jumysy tirkelip, olardyń 90%-dan astamy tolyq qalpyna keltirildi. Qalǵan aýmaqtarda abattandyrý jumysy aıaqtalyp keledi. Ásirese, jabyn sapasy men aýmaqty bastapqy qalpyna keltirýge basa nazar aýdarylyp otyr.
Qala ákimi apparatynyń málimetinshe, Almatyda qurylys-montaj jáne qalpyna keltirý jumystaryna kúndelikti monıtorıń júrgizý júıesi engizilgen. Arnaıy mobıldi toptar nysandardy aralap, abattandyrýdyń jaı-kúıin tirkeıdi jáne anyqtalǵan kemshiliktiń jedel joıylýyn qamtamasyz etedi.
Almatyda josparlanǵan qurylys-montaj jumystarynyń basym bóligi aıaqtalýǵa jaqyn. Aýlany abattandyrýǵa, jol jóndeýge jáne qolaıly qoǵamdyq keńistikter qurýǵa erekshe mán berilip otyr. İri jobalardyń qatarynda – Esentaı ózeniniń jaǵalaýyn qaıta jańǵyrtý jáne Bas botanıkalyq baq aýmaǵyn jańartý bar.
Qalada júzden astam ınfraqurylymdyq jáne áleýmettik joba qolǵa alynǵan, olardyń deni aıaqtaldy. Bul jumystar bilim berý, densaýlyq saqtaý, ınjenerlik jeliler jáne aýlany abattandyrý baǵytynda jalǵasyp jatyr. Injenerlik ınfraqurylym qarqyndy damyp keledi, jańa mektepter, sport jáne áleýmettik nysandar salynyp, kólik qoljetimdiligin arttyrý jáne komýnaldyq júıelerdi jańǵyrtý jobalary júzege asyrylyp jatyr.
Darhan Satybaldy aýdan ákimderi men qala basqarmalary basshylaryna jer qazý jumysy júrgizilgen aýmaqtardy qalpyna keltirý qarqynyn jedeldetip, barlyq jumysty kún sýytqanǵa deıin aıaqtaýdy tapsyrdy. Ol árbir aýmaq jumystan keıin bastapqy qalpyna keltirilýge tıis ekenin atap, abattandyrý sapasyna baqylaýdy kúsheıtýdi mindettedi.