Almaty ákimi Darhan Satybaldy qaladaǵy eń iri sport nysandarynyń biri jańa «Alataý» tenıs ortalyǵynyń ashylý rásimine qatysty, - dep habarlaıdy Aqshamnews.kz tilshisi.
Bul ortalyq buqaralyq jáne kásibı tenıstiń damýyna serpin beretin mańyzdy sport alańy bolmaq. Joba qala ákimdiginiń jáne Qazaqstan tenıs federasıasynyń qoldaýymen júzege asyryldy. Bul jumys 2018 jyly bastalǵan bolatyn, al onyń aıaqtalýy qalanyń sport ınfraqurylymy úshin mańyzdy oqıǵaǵa aınaldy.
İs-sharaǵa Qazaqstan tenıs federasıasynyń prezıdenti Bolat Ótemuratov, sondaı-aq ATP 250 Almaty Open halyqaralyq týrnırine qatysyp jatqan Danııl Medvedev, Karen Hachanov, Aleksandr Shevchenko, Beıbit Juqaev jáne Flavıo Kobollı syndy kásibı tenısshiler qatysty. Sportshylar balalarǵa arnalǵan sheberlik dárisin ótkizip, jańa ortalyq aýmaǵyna aǵashtar otyrǵyzdy.
Darhan Satybaldy Almaty úshin bul ortalyqtyń ashylýy óte mańyzdy ekenin atady:
"Jańa tenıs ortalyǵy qalamyzdyń qarqyndy damyp kele jatqan aýdanynda boı kóterip, mańyzdy sport ınfraqurylymynyń bir bóligine aınaldy. Bul nysan jas sportshylardy daıarlaýǵa, sondaı-aq ulttyq jáne halyqaralyq deńgeıdegi jarystar ótkizýge múmkindik beredi. Mundaı jobalar Almatynyń álemdik sport kartasyndaǵy bedelin arttyryp, qalanyń ári qaraı damýyna serpin beredi", — dedi qala ákimi.
Zamanaýı ortalyq halyq tyǵyz ornalasqan Alataý aýdanynda ornalasqan, halyqaralyq standarttarǵa saı keledi. Munda kásibı sportshylar men áýesqoılar úshin qolaıly jaǵdaı jasalǵan: bilikti jattyqtyrýshylar qyzmet etedi, túrli deńgeıdegi týrnırler ótkizýge múmkindik bar.
Jalpy aýmaǵy 5 myń sharshy metrden asatyn ortalyqta 14 tenıs korty bar: onyń tórteýi jabyq, tórteýi «hard» jabynymen ashyq, al qalǵan altaýy topyraq jabyny bar alańdar. Sonymen qatar, jattyǵý zaly, medısınalyq kabınet, konferens-zal jáne ákimshilik blok qarastyrylǵan.
Syrtqy korttarda 150 oryndyq, al jabyq alańdarda 100 oryndyq kórermen trıbýnalary ornatylǵan. Sport nysanda kúnine 500 adamǵa deıin jattyǵa alady. Munda ınklúzıvti tenısti damytýǵa jáne kópbalaly ári áleýmettik turǵydan az qamtylǵan otbasylardan shyqqan balalarǵa arnalǵan tegin jáne jeńildetilgen jattyǵýlar uıymdastyrýǵa erekshe kóńil bólingen.