Almaty polısıasy “Boryshker” jedel aldyn alý is-sharasyn ótkizip jatyr.
Onyń maqsaty - “Quqyq buzýshylyqqa múldem tózbeýshilik” qaǵıdattaryn, jasalǵan quqyq buzýshylyq úshin jazanyń bultartpastyǵyn qamtamasyz etý jáne salynǵan ákimshilik aıyppuldardy óndirýdiń tıimdiligin arttyrý, dep habarlaıdy Almaty-akshamy.kz Polisia.kz-ke silteme jasap.
İs-sharaǵa MKD-niń qyzmetkerleri men jeke sot oryndaýshylarynyń óńirlik palatasynyń sot oryndaýshylary tartyldy. Avtokólikter qarqyndy júretin oryndarǵa patrúldik polısıanyń kólikteri jumyldyryldy. Avtomattandyrylǵan aqparattyq júıelerdiń múmkindikteri de keńinen qoldanylady, onyń ishinde “Qorǵaý – Qaýipti júrgizýshi” salynǵan ákimshilik aıyppuldar boıynsha bereshegi bar boryshkerlerdi avtomatty túrde esepteıdi.
«İs-shara shekteý qoıylǵan adamdar men kólik quraldaryn, sondaı-aq ákimshilik quqyq buzýshylyq týraly is boıynsha zańmen belgilengen merzimde erikti túrde oryndalmaǵan qaýlylary bar boryshkerlerdi anyqtaýǵa baǵyttalǵan. Odan keıin tártip buzýshynyń kóligi mamandandyrylǵan aıyppul turaǵyna ornalastyrylady. Kelgen jeri boıynsha Qazaqstan Respýblıkasynyń Ákimshilik quqyq buzýshylyq týraly kodeksine sáıkes tárkileý hattamasy toltyrylady. Ustalǵan kólik quralyn aıyppul turaǵynan shyǵarý aıyppuldardy tolyq ótegen kezde ǵana júzege asyrylady», – dedi Almaty qalalyq PD ákimshilik polısıa basqarmasy bastyǵynyń orynbasary Bolatbek Baıatanov.
Ákimshilik tájirıbe bóliminiń málimetinshe, is-shara bastalǵannan beri kólik ıelerinde 35,5 mln teńgeden astam tólenbegen aıyppuldary bar 44 kólik quraly ustaldy jáne aıyppul turaǵyna ornalastyryldy. 5,6 mln teńgeden astam somaǵa salyq bereshegi men shekteýleri bar 23 kólik quraly da aıyppul turaǵyna ornalastyryldy.