Búgin Almatydaǵy Ulttyq kitaphanada kórnekti aqyn Ádilǵazy Qaıyrbekovtiń 70 jasqa tolý mereıtoıyna oraı «ǴAZALǴUMYR» atty aqyn benefısi ótti, - dep habarlaıdy aqshamnews.
Ádilǵazy Qaıyrbekov – belgili qoǵam jáne mádenıet qaıratkeri, kórnekti aqyn, Halyqaralyq «Alash» ádebı syılyǵynyń laýreaty, «Qurmet ordeniniń», «Eren eńbegi úshin» medaliniń ıegeri, S. Muqanov pen Ǵ. Músirepovtiń ádebı-memorıaldyq mýzeı kesheniniń aǵa ǵylymı qyzmetkeri, fılologıa ǵylymdarynyń kandıdaty.
Kórnekti aqyn 1978 jyly eńbek jolyn S. Muqanov ádebı-memorıaldyq mýzeı-úıiniń tuńǵysh ekskýrsıa jetekshisi bolyp bastaǵan. 1980-2000 jyldary buqaralyq aqparat quraldarynda (Qazaq televızıasy, «Lenınshil jas» (qazirgi «Jas Alash»), «Halyq keńesi», «Qazaq eli», «Shalqar» gazetteriniń redaksıalarynda) qyzmet istegen. 2000 jyldan beri Mýzeı kesheniniń dırektory, jetekshisi, aǵa ǵylymı qyzmetkeri. Qazaqstan Jazýshylar odaǵynyń basqarma múshesi, Poezıa keńesiniń tóraǵasy. 2014 jyly 10 tomdyq shyǵarmalar jınaǵy jaryq kórgen.
Aqyn benefısinde «Ǵazalǵumyr» jyr jınaǵy, «Kók dápter» maqalalar jınaǵy jáne «Bıblıografıalyq kórsetkish» atty kitaptary tanystyryldy. Aqynnyń sózinshe keshti ótkizýdegi basty maqsaty oqyrmandary, zamandastary aldynda esep berý.
Aqynnyń benefısin ne úshin «Ǵazalǵumyr» dep ataǵany týraly suraqqa avtor: – «Ǵazal» bul, shyǵystyq uǵymda «jyr» degen maǵyna bildiredi. «Jyrǵumyr» degen sóz. Ómiriń túgel óleńmen ótý aqyn úshin arman, – degen daýabyn berdi.
İs-sharany Almaty qalasy mýzeıler birlestigi jáne Qazaqstan Jazýshylar odaǵy uıymdastyrdy. Onyń maqsaty – qazaq ádebıeti men mádenıetin damytýda jemisti eńbek etip kele jatqan sóz sheberi Ádilǵazy Qaıyrbekovtiń ómiri men shyǵarmashylyǵyn nasıhattaý.
Atalǵan sharaǵa Almaty qalasy ákiminiń orynbasary Azamat Qaldybekov, Qazaqstan Jazýshylar odaǵynyń basqarma tóraǵasy Mereke Qulkenov bastaǵan aqyn, jazýshylar, M. Áýezov atyndaǵy Ádebıet jáne óner ınstıtýtynyń dırektory Kenjehan Matyjanov bastaǵan belgili tulǵalar, ǵalymdar, ádebıet zertteýshileri, mýzeı qyzmetkerleri, BAQ ókilderi jáne ózgede ádebıetsúıer qaýym jınaldy.
Qala ákiminiń orynbasary Azamat Qaldybekov Ádilǵazy Qaıyrbekovke Prezıdenttiń quttyqtaý haty men tósbelgini tabystady. Sondaı-aq Mádenıet jáne aqparat mınıstri Aıda Balaevanyń arnaıy quttyqtaý hatyn Ulttyq kitaphana dırektory Ǵazıza Nurǵalıeva tabystady.
Keshti moderator retinde jýrnalıs, qoǵam qaıratkeri, Qazaqstan Jazýshylar odaǵynyń Basqarma tóraǵasynyń bas keńesshisi Ámirjan Qosan júrgizdi. Ol alǵy sózinde aqynnyń kásibı biligimen qosa adamı qasıetteri jaıly da atap ótti.