Búgin Almatyda terapevt, pýlmonolog, dermatolog, revmatolog, jalpy praktıka dárigerleriniń qatysýymen VIII Halyqaralyq revmatologtar kongresi jumysyn bastady.
Kongresti QR Densaýlyq saqtaý mınıstrliginiń qoldaýymen Kardıologıa jáne ishki aýrýlar ǴZI, Respýblıkalyq revmatologıalyq ortalyq jáne Qazaq revmatologıa alqasy uıymdastyrdy, dep habarlaıdy aqshamnews.kz.
«Bizdiń ınstıtýt bazasynda úshinshi deńgeıdegi revmatologıa ortalyǵynyń qurylýyna baılanysty búgingi is-shara asa mańyzdy bolyp otyr. Bul revmatologıalyq aýrýlary bar pasıentterge mamandandyrylǵan kómekti damytýda, sondaı-aq Qazaqstannyń revmatologıalyq qyzmetiniń ǵylymı-ádistemelik jáne uıymdastyrýshylyq rólin nyǵaıtýda mańyzdy qadam. Biz jańa Ortalyq dıagnostıka men emdeýdiń ozyq tehnologıalaryn engizýge, halyqaralyq yntymaqtastyqty keńeıtýge jáne joǵary bilikti mamandardy daıarlaýǵa yqpal etetin klınıkalyq, ǵylymı jáne bilim berý platformasyna aınalatynyna senimdimiz», – dedi Kardıologıa jáne ishki aýrýlar ǴZI Basqarma tóraǵasynyń ǵylymı-klınıkalyq jáne ınovasıalyq qyzmet jónindegi orynbasary Jamılá Qaıbýllaeva.
”Revmatologıalyq aýrýlar, ókinishke oraı, jastar arasynda da keń taralýda. Bul aýrýlar adamdy múgedektikke, mezgilsiz ólim qaýpine ákelýi de múmkin. Sondyqtan aýyr zardaby tıetin keselderdi erterek anyqtaý, nátıjeli emdeý úshin jańa ınovasıalar engizilýde. Búgingi kúni óńirlerde de revmatologıalyq ortalyqtar qurýdyń mańyzy zor”, – dep atap ótti QR Densaýlyq saqtaý mınıstrliginiń shtattan tys bas revmatology, Respýblıkalyq revmatologıa ortalyǵynyń basshysy, Qazaq revmatologıa alqasynyń prezıdenti Ǵalymjan Toǵyzbaev.
Iá, Qazaqstanda da, álemde de revmatologıalyq aýrýlary bar naýqastardyń sany ósý ústinde. Bul aýrýlardyń kópshiligi aýtoımmýndy. Olar ımýnıtettiń durys jumys istemeýinen týyndaıdy. Olar júıelik dep atalady. Óıtkeni birden birneshe músheni qamtıdy. Barlyq derlik tinder proseske qatysady, biraq býyndar, búırek, teri, mı, qan tamyrlary eń kóp zardap shegedi. Bul aýrýlar adammen ómiriniń sońyna deıin qalady. Biraq buǵan úkim retinde qaraýdyń qajeti joq. Iá, buryn revmatologıalyq aýrýlardan kóp adam múgedek bolyp qalatyn, ómiri de qysqa bolatyn. Al búginde adamnyń uzaq ómir súrýge múmkindigi bar deıdi sarapshylar.
Eki kúndik kongreste plenarlyq otyrys, taqyryptyq seksıalar jáne satellıt sheńberinde revmatologıa, pýlmonologıa, dermatologıa, qoǵamdyq densaýlyq saqtaý salasyndaǵy 35 jetekshi sheteldik jáne otandyq sarapshy, sonymen qatar jas ǵalymdar klınıkalyq keıstermen ǵylymı baıandamalar jasaıdy. Júıeli qyzyl jegi, revmatoıdty artrıt, podagra, psorıazdy artrıt, osteoporoz jáne osteoartrıtti emdeý, onyń ishinde jańa gendik-ınjenerlik bıologıalyq preparattardy qoldaný boıynsha jańartylǵan halyqaralyq klınıkalyq usynystar usynylady.
Kongres qatysýshylaryna belgilengen úlgidegi sertıfıkattar beriledi.