Álemdegi alpaýyt elderdiń keleli jıyny bolmaq
«Úlken jıyrmalyq» elderi pandemıadan keıingi alǵashqy samıtin ótkizedi, dep habarlaıdy Almaty-akshamy.kz
Italıa astanasy osyǵan qyzý daıyndalyp jatyr. Kezdesý erteń bastalady. Biraq Qytaı men Reseı basshylary onlaın qatysady. Al osymen 16-shy márte uıymdastyrylyp otyrǵan basqosýdyń basty taqyryptary - pandemıadan keıingi álemdik ekonomıkany qalpyna keltirý men klımattyń ózgerýimen kúres.
Sonymen qatar Irannyń ıadrolyq baǵdarlamasy da qaralady. Shotlandıanyń Glazgo qalasyndaǵy klımattyń ózgerýimen kúres boıynsha halyqaralyq konferensıa aldaǵy jeksenbide bastalady.
Sharaǵa 200-den astam eldiń ókilderi qatysady. Kezdesýde 2015 jyly ǵalamdyq jylynýmen kúres boıynsha Parıj kelisimshartyna qol qoıylǵannan keıin atqarylǵan is-sharalar men keleshekte qolǵa alynatyn bastamalar talqylanady.
Maqsat - aýaǵa kómirqyshqyl gazyn shyǵarý mólsherin azaıtyp, klımattyń jylynýyn toqtatý. Kezdesý aldynda tabıǵatty qorǵaýshylar da belsendilik tanytyp, túrli sherýler uıymdastyryp jatyr.
«Qazir álemniń kóp elinde klımattyq tótenshe jaǵdaı ornaǵan. Orman órti, sý tasqyny kóbeıdi. Álem basshylary munyń barlyǵyn biledi. Sondyqtan olar Glazgoda klımattyń ózgerýine baılanysty apatty jaǵdaıdyń týyndaýynyń aldyn alý úshin naqty sharalar qabyldaýy kerek», - dedi Glasgow Actions uıymynyń basshysy Endrú Nazdın.