Fransıada úkimettiń zeınetkerlik jasyn 62-den 64-ke kóterý týraly sheshiminen týyndaǵan daǵdarys jalǵasyp jatyr. Beısenbidegi zeınetaqy reformasyna qarsy narazylyq aksıalaryna búkil el boıynsha mıllıonnan astam adam qatysty.
Eldiń İİM málimetteri boıynsha, Parıjde júz myńnan astam demonstrant kóshege shyǵyp, polısıamen qaqtyǵystar bastaldy. Bordoda Mýnısıpalıtet ǵımaratynyń esigi órtendi, dep habarlaıdy Almaty-akshamy.kz QazAqparat silteme jasap.
El boıynsha tártipsizdikterge qatysy bar degen aıyppen 80 adam qamaýǵa alyndy, onyń 33-i Parıjde. Bul – Fransıa prezıdenti Emmanýel Makron óte qajet dep sanaıtyn reformaǵa qarsy demonstrasıalardyń toǵyzynshy kúni. Qańtarda qaraýǵa usynylyp, ótken aptada parlamenttiń daýysynsyz maquldanǵanǵan zań eldegi jaǵdaıdyń shıelenisýine ákeldi. Úkimet sheshiminiń kúshi senimsizdik votýmy arqyly ǵana joıylady. Biraq, dúısenbide el úkimeti parlamentte jarıalanǵan senimsizdik votýmyn jeti daýyspen eńserdi. Fransıanyń bas kásipodaǵy «Jalpyǵa ortaq eńbek konfederasıasy» (CGT) málimetteri boıynsha, beısenbide Parıj kóshelerinde 800 myńǵa jýyq adam jınaldy. Alaıda polısıa málimetinshe, narazylyq aksıasyn 119 myń adam shyqty.Parıjdiń keıbir aýdandarynda tártipsizdikter jasaldy. Sherýshilerdiń shaǵyn toptary polısıaǵa tas laqtyryp, otshashý jaqty, tártip saqshylary kózden jas aǵyzatyn gaz qoldandy.Bastılıa alańynan Parıj operasynyń ǵımaratyna deıingi sherý baǵytyndaǵy dúkender, meıramhanalar jáne basqa da mekemeler saqtyq maqsatynda aldyn ala qorshaldy. Jol boıynda polısıa qyzmetkerleri kóp boldy. Barlyǵy bes myńǵa jýyq tártip saqshysy jumyldyryldy.Mundaı sherýler Fransıanyń basqa qalalarynda da ótti. Eldiń batysyndaǵy Nant qalasynda da narazylyq bildirýshiler polısıa qyzmetkerlerine qatty zattar laqtyryp, qoqys jáshikterin órteýge kiriskende polısıa kózden jas aǵyzatyn gaz shashty. Rende sý shashatyn qurylǵylar paıdalanyldy. Nıssada sherýshiler áýejaı ǵımaraty mańynda blokada jasady. Bordoda qalalyq ákimdiktiń esikteri órtengeni habarlandy. Olardy kim jáne qalaı órtegeni áli belgisiz. Órt jyldam sóndirildi. Kásipodaqtar narazylyq aksıalary sátti ótip jatyr dep esepteıdi, óıtkeni el turǵyndary prezıdent Makron men úkimetke óz oılaryn bildire aldy. Olar halyqty 28 naýryzda qaıtadan kóshege shyǵýǵa shaqyrdy.