Megapolıstiń ár aýdanynda jastarǵa arnalǵan komúnıtı ortalyqtar ashyldy, onda olar túrli kýrsqa tegin qatysyp, shyǵarmashylyq ıdeıalarmen almasady, bilim alyp, jumys ta taba alady.
Komúnıtı ortalyqty damytý jónindegi joba Qazaqstandaǵy alǵashqy ári ázirge jalǵyz joba. Bul úshin Almaty ákimdigi 2023 jyly ǵımarattar satyp alyp, jóndegen. Osylaısha, qalada NEET delinetin jastardyń paıyzyn qysqartý jáne jas talanttardyń damýyna jaǵdaı jasaý josparlanǵan.
300 sharshy metrden bastalatyn qoǵamdyq keńistikti 8 komúnıtı ortalyq kóp aýdıtorıadan turady, yńǵaıly kovorkıng aımaqtarymen jáne yńǵaıly ári ýaqytty tıimdi ótkizý úshin qajetti jabdyqtarmen jabdyqtalǵan. Komúnıtı ortalyqtar jylyna 800 myńnan astam jasqa qyzmet kórsetedi.
Ár ortalyqta rezıdentterge kýrs tańdaýǵa nemese mamandyq týraly sheshim qabyldaýǵa kómektesetin steıkholder bar. Mysaly, mobılografıa, targetıng nemese SMM kýrstaryn oqý, sonymen qatar, kásip ashqysy keletinder zańgerlik keńes pen kásipkerlerden keńes ala alady.
Jastardy kóptep tartý úshin túrli tásil – aqparattyq kitapshalar taratýǵa deıin qoldanylady. Alaıda negizinen áleýmettik jelilerge basymdyq beriledi.
Medeý aýdanyndaǵy komúnıtı ortalyqtyń steıholderi Rýstam Qaıryevtiń aıtýynsha, ortalyqtarda jumyssyz jastar belgili bir jetistikke jetken zamandastarymen tyǵyz aralasyp, qaı baǵytta qımyldaý kerektigi jaıly jańa baǵdar ala alady.
«Medıasaýattylyq kýrsyn ótkizemiz, qazaq tilin damytamyz. Bizde úıden shyqpaı-aq qazaq tilin tegin úırenýge múmkindik beretin qyzyqty «Úıde sóıle» jobasy bar: buǵan qazaq tilin biletin kórshiler kómektesedi, al komúnıtı ortalyqta aıyna bir ret qazaq tilin zamanaýı ádistermen oqytatyn ambassadorlarmen kezdesýler ótkiziledi», - deıdi Rýstam Qaıryev.
Komúnıtı ortalyqtardyń zamanaýı stılde jasalǵanyn, al dızaında etnıkalyq element bar ekenin atap ótken jón.
Jetisý aýdanynyń ákimi Gúlnár Kókebaevanyń pikirinshe, komúnıtı ortalyqtar jastar bas qosatyn oryn ǵana emes, bul Memleket basshysy aıtqandaı olardyń jan-jaqty damýy úshin arnaıy keńistik bolady.
«Qalada 14 jastan 35 jasqa deıingi 689 myńǵa jýyq jas bar. Onyń 58 myńy Jetisý aýdanynda. 14 jastan bastap kóptegen oqýshy bolashaqta qaıda oqý kerektigin, qaı baǵytqa basymdyq berý kerektigin suraıdy. Sondyqtan Almatyda ashylyp jatqan jastarǵa arnalǵan ortalyqtar jastarǵa shynymen kómektesetinine senimdimin», - deıdi Gúlnár Kókebaeva.
Komúnıtı ortalyqtarynda mýzykant muǵalimder dombyra úırený sabaǵyn ótkizedi. Jastarǵa dybys jazý stýdıasy, psıhologtyń keńesi, ózin-ózi damytý boıynsha sheberlik dáristeri jáne t.b. qoljetimdi. Buǵan qosa, komúnıtı ortalyqtarda jastardyń ártúrli bilim berý baǵdarlamalaryn, oqý oryndaryndaǵy granttar, sonyń ishinde ákimniń granty týraly bilýge múmkindigi bar.
«Qalada jastardyń bas qosyp, jan-jaqty damyp, bilim alýyna arnalǵan oryndar jetispedi. Bul jastardyń ári-beri sabylyp júrmeýine yqpal etip, ár aýdan jastary úshin erekshe mańyzdy oryn bolady», - dedi jastardy, mádenıet pen sportty damytý jónindegi jobalyq keńseniń basshysy Krıstına Bekmýrzaeva.
Barlyq ortalyqta kólikke, qoǵamdyq tamaqtanýǵa, sport jáne mádenı ınfraqurylymdy paıdalanýǵa, oqytý men sheberlik dáristerine jeńildikter beretin keshendi dıskonttyq kartalar jumys isteıdi. Ortalyqtyń árbir rezıdenti osy artyqshylyqtardy paıdalana alady. Osylaısha, megapolıste tıimdi jastar saıasaty úshin keshendi ınfraqurylym qurý máselesi sheshilip keledi.
