«Altyn Orda» bazary sıfrlandyryldy, dep habarlady Saýda jáne ıntegrasıa mınıstrligi.
Saýda komıteti «Altyn orda» bazarynyń ákimshiligimen birlesip, bazar jumysynyń ashyqtyǵyn qamtamasyz etý úshin birlesken is-sharalar josparyn bekitti. Onyń sheńberinde 2023 jylǵy jeltoqsannan bastap, bazardyń kireberisine 6 QR-kody bar avtomatty shlagbaým men kirý aqysyn tóleý úshin pavılondarda 6 POS-termınal ornatyldy.
Sondaı-aq «Altyn Orda» bazaryn sıfrlandyrý boıynsha altynordaresmi.kz saıty iske qosyldy.
Onda azamattarǵa qoljetimdi saýda oryndarynyń sany, olardyń alańy, jaldaý quny týraly aqparat, jaldaý (paıdalaný) shartynyń talaby, ony buzý tártibi men negizi týraly málimet kórsetilgen. Bazar basshylyǵy tarapynan keri baılanys bolý úshin onlaın-shaǵym berý jáne usynys engizý múmkindigi engizildi.
Joǵaryda atalǵan is-sharalar bazar qyzmetiniń ashyqtyǵyn qamtamasyz etýge, búdjetke salyq tólemderiniń túsimderin ulǵaıtýǵa múmkindik beredi, - dep jazylǵan habarlamada.
Esterińizge sala keteıik, 2023 jyldyń tamyzynda Saýda jáne ıntegrasıa mınıstri Arman Shaqqalıev anyqtalǵan buzýshylyqtardy joıý, naryqty jańǵyrtý jáne fermerler úshin tegin saýda oryndaryn usyný jónindegi jumysty úılestirý úshin bazar aýmaǵynda mobıldi toptyń qatysýymen keńeıtilgen keńes ótkizdi.
2023 jylǵy jeltoqsanda Saýda Komıtetiniń tóraǵasy Aıdar Ábildabekov «Altyn Orda» bazaryna baryp, bazar ákimshiligimen saýda alańdaryn jańǵyrtý máselelerin talqylady. Keńes qorytyndysy boıynsha Aıdar Ábildabekov qysqa merzimde bıznes-prosesterdi sıfrlandyrýǵa kóshýdi jedeldetýdi tapsyrdy.