Búgingi tańda Spýtnık V tirkelgen jáne 69 elde jappaı vaksınasıalaý úshin qoldanylýda.
Qazaqstandyqtar Spýtnık V vaksınasy aýtoantıdenelerdiń paıda bolýyna jáne aýtoımmýndyq aýrýlardyń damýyna ákeletini týraly habarlamalar taratýda. Olardyń aıtýynsha, preparattyń tıimdiligi dáleldenbegen, sondyqtan ony egý qaýipsiz emes. Bul jalǵan, dep habarlaıdy Almaty-akshamy.kz Stopfake.kz-ke silteme jasap.
Bul týraly reseılik ekonomıs Mıhaıl Delágın málimdegen eken. Ol dáriger de, vaksınasıa nemese jalpy medısına salasyndaǵy maman da emes. Alaıda, bul oǵan COVID-19 pandemıasyna qatysty málimdemeler jasaýǵa esh kedergi keltirmeıdi. Mysaly, «Komsomolskaıa pravda» radıosynyń sońǵy efırleriniń birinde ol vaksınasıalanǵan adamdardyń KVI juqtyrý múmkindigi ekpe saldyrmaǵandarǵa qaraǵanda 1,5 ese joǵary ekenin jetkizdi. Biraq bul málimdeme resmı statısıkamen jáne ǵylymı derektermen rastalmaıdy. Sondaı-aq, Delágınniń aıtýynsha, COVID-19 aýyrǵan «nóldik pasıent» Ýhanǵa kelgen AQSH áskerı qyzmetshi bolǵan. Shyndyǵynda, nóldik naýqasty ǵalymdar áli anyqtaǵan joq. Spýtnık V vaksınasynyń tıimdiligi dáleldenbegen degen tezıster de ǵylymı derekterge qaıshy keledi. Preparattyń klınıkalyq synaqtarynyń úshinshi kezeńiniń aralyq nátıjeleri aǵymdaǵy jyldyń aqpan aıynda medısınalyq resenzıalanǵan The Lancet jýrnalynda jarıalandy. Maqalada vaksınanyń tıimdi jáne qaýipsiz ekendigi aıtylǵan. Synaqqa qatysýshylarda aýtoımmýndyq aýrýlardyń damý jaǵdaılary týraly habarlanǵan joq. Búgingi tańda Spýtnık V tirkelgen jáne 69 elde jappaı vaksınasıalaý úshin qoldanylýda. KVI qarsy egý naýqany bastalǵannan beri preparattyń qaýipsiz jáne tıimdi ekendigi týraly dálelder jetkilikti jınaldy. Bul týraly Nature jáne The conversation sıaqty bedeldi basylymdar habarlady. Sondaı-aq, ǵalymdar Spýtnık V vırýstyń ártúrli nusqalaryna qarsy tıimdiligin anyqtaý úshin egilgen adamdardyń qanyn alyp zerttegen zertteýler bar. Delágın aıtqan aýtoımmýndy antıdenelerdiń damýy týraly ǵylymı eńbekte aıtylmaǵan. Sonymen qatar ǵalymdar KVI qarsy vaksınalardyń eshqaısysynyń, sonyń ishinde mRNQ men vektorlyq preparattardyń aýtoımmýndy aýrýlardyń damýy arasyndaǵy baılanysty tappady. Biraq COVID-19 aýyrǵan vaksınasıalanbaǵan adamdarda aýtoantıdenelerdiń bolýy týraly birden birneshe ǵalymdar toby habarlady. Demek, Mıhaıl Delágın medısına jáne vaksınasıa salasyndaǵy senimdi derekkóz emes. Spýtnık V vaksınasynyń dáleldenbegen tıimdiligi men preparattyń aýtoımmýndy aýrýlardy týdyrýy týraly málimdemeler negizsiz jáne qoldanystaǵy ǵylymı málimetterge qaıshy keledi.