Sheberhana jergilikti kásipkerlikti damytýǵa, halyqty jumyspen qamtýǵa múmkindik beredi.
Qapal aýylynda júndi óńdeý jáne ulttyq kórpe jasaý boıynsha etnıkalyq sheberhana ashyldy, dep habarlaıdy Almaty-akshamy.kz Baq.kz-ke silteme jasap.
Búginde el ıgiligine arnalǵan baǵdarlamalar memleketten qoldaý taýyp, kóptep júzege asýda. Tek baǵdarlama tıimdiligin paıdalana bilýge saýattylyq, izdenis qajet. Atalǵan jobaǵa sáıkes júndi óńdeıtin aparattar ákelindi.
«Tamshybulaq» qoǵamdyq qory «Azamattyq bastamalardy qoldaý ortalyǵy» KEAQ grant qarajatymen jáne «Aýylda azamattyq bastamalardy damytýǵa baǵyttalǵan is-sharalar keshenin uıymdastyrý» taqyrybyndaǵy baıqaý aıasynda «Júndi óńdeý jáne ulttyq kórpe jasaý boıynsha etnıkalyq sheberhana ashý» áleýmettik jobasyn júrgizýde.
Jobanyń basty maqsaty - ulttyq tól ónerdi damytý úshin etnıkalyq sheberhana ashý arqyly jumyssyz áıelderdi jumysqa ornalastyrý, sonymen qatar aýylda kásipkerlikti damytý, jastarǵa ata kásipti úıretý jáne halyqqa qyzmet kórsetý, sonyń ishinde áleýmettik osal toptarǵa jeńildikter berý.
«Qazir kásiptiń, eńbektiń zamany emes pe? Biz de ýaqyt aǵymyna ilesip, kásip kózin ashýdy maqsat ettik. Tıisti qujattarymyzdy ótkizdik. Sonyń nátıjesinde, baǵdarlama jeńimpazdarynyń biri bolyp tanylyp, qaıtarymsyz grantqa ıe boldyq. Kásibimizdi bastap, kóne zamannan qol úzbeı kele jatqan, ulttyq qolónerdi damytýymyz kerek», - deıdi «Tamshybulaq» qorynyń jetekshisi Janat Esimbekov.