Memlekettik saıası júıeniń negizgi tuǵyry - prezıdenttik basqarý júıesi osy konstıtýsıada alǵash ret zańdastyryldy.
1995 jyly 30 tamyzda júrgizilgen referendýmnyń nátıjesinde burynǵy memlekettik qurlystyń kemshilikterin joıǵan Qazaqstan Respýblıkasynyń jańa konstıtýsıasy qabyldandy, dep habarlaıdy Almaty-akshamy.kz. Bul týraly ál-Farabı atyndaǵy QazUÝ profesory, t.ǵ.k. Fatıma Qozybaqova Almaty-akshamy.kz tilshisimen suhbaty barysynda aıtty.
Ata Zań - eldiń Ar- namysy.
«Qazaq eli óz otaýyn tikkeli eldiń berekesi men birligin saqtaıtyn Ata Zańyn qabyldady. 1995 jyly 30 tamyzda júrgizilgen referendýmnyń nátıjesinde burynǵy memlekettik qurlystyń kemshilikterin joıǵan Qazaqstan Resbýplıkasynyń jańa konstıtýsıasy qabyldandy. Qazaqstan Respýblıkasynyń jańa konstıtýsıasy memleketimizdiń oıdaǵydaı damýynyń quqyqtyq irgetasy bolyp tabylady. Konstıtýsıa Qazaqstandy prezıdenttik basqarý nysanyndaǵy birtutas memleket dep jarıalady. Memlekettik saıası júıeniń negizgi tuǵyry - prezıdenttik basqarý júıesi osy konstıtýsıada alǵash ret zańdastyryldy», - dep atap ótti profesor.
Onyń aıtýynsha, Ata zań qabyldanǵannan keıin oǵan 1998, 2007 jáne 2011 jyldary ózgertýler engizildi.
«2007 jylǵy 21 mamyrda konstıtýsıaǵa ózgerister men tolyqtyrýlar engizilýimen baılanysty, ol eldiń prezıdenttik basqarýdan prezıdenttik-parlamenttik basqarý túrine ótýin zań júzinde baıandy etti. Mundaı qadam demokratıany damytý men azamattyq qoǵam qurýǵa baǵyttalǵan Qazakstan Respýblıkasynda júzege asyrylyp otyrǵan saıasattyń oń nátıjesin berdi. Bul reforma zaman talabynan, tarıhı qajettilikten týǵan elimizdiń alǵa basýynyń, ilgerileýiniń mańyzdy alǵysharty boldy», - deıdi F.Qozybaqova.
Osylaısha elimiz saıası jańarýdyń, demokratıalyq damýdyń jańa kezeńine aıaq basty.
«Sóıtip, biz tarıhymyzda tuńǵysh ret Shyǵys Azıa memleketteriniń tájirıbesin jáne ózimizdiń polıetnıkalyq ári kóp dindi qoǵamymyzdyń ereksheligin eskerip, Batys demokratıasynyń qaǵıdattaryna saı keletin táýelsiz memleketimizdi ornattyq, - dep aıtty Fatıma Aqynbaıqyzy.
Profesor aıtyp ótkendeı, Qazaqstan ulttyq múddelerdi jáne álemdik damý úrdisterin eskeretin saıası qurlystyń ózindik úlgisin jasady. Konstıtýsıalyq evolúsıa men quqyqtyq júıeni satylap reformalaý nátıjesinde elimizde memlekettik bıliktiń teńgerimdi de tıimdi júıesi qalyptasty. Respýblıkada memlekettik bılik zań shyǵarý, atqarý jáne sot tarmaqtaryna bóliný qaǵıdatyna sáıkes júzege asyryldy.
«Bizdiń konstıtýsıamyz halqymyzdyń ǵasyrlar boıy ańsaǵan shynaıy egemendikke qol jetkizgendiginiń naqty kórinisi bolyp tabylady. Sondyqtan respýblıkamyzdyń árbir azamaty Ata Zańymyzdyń mazmunyn jete bilip, onyń talaptary men qaǵıdalaryn múltiksiz saqtaýǵa, memlekettik nyshandardy qurmetteýge mindetti, - dep atady Qozybaqova.
Osy ótken 26 jyldyń ishinde táýelsiz Qazaqstannyń táýelsiz tarıhyn jasaýǵa qolaıly jaǵdaılar týǵanyn aıtty tarıhshy.
«Osy maqsatta ál-Farabı atyndaǵy Qazaq ulttyq ýnıversıtetiniń tarıhshylary halqymyzdyń san ǵasyrlyq tarıhyn ómir shyndyǵyna saı zertteý men nasıhattaý, ulttyq rýhty áspetteýge, táýelsiz otanymyzdyń naǵyz patrıottaryn tárbıeleýge qyzmet etip keledi», - deıdi ol.
Ol búginde elimizdiń jarqyn bolashaǵyna nyq senimmen qaraıtynyn aıtty.
«Jalpy tilegim: taǵdyr elimizge órkenıetti memleketterdiń aldyńǵy leginde oryn alýdy násip etsin!», - dedi tarıhshy.