Úsh ǵasyrlyq tarıhy bar, álemdegi eń bedeldi Danıa Koróldik teatry jaıly estigen be edińiz? Munda álemniń túkpir-túkpirinen kelgen eń talantty ártister óner kórsetip, eń myqty horeograftar sabaq beredi. Al Almaty oblysyndaǵy aýyldan shyqqan qarapaıym jigit Meırambek Nazarǵojaev osy koróldik teatrdyń solısi bolyp ómirlik kelisimshartqa otyrǵan. Bul - eki taraptyń arasynda ómir boıy kúshinde bolatyn kelisim. Iaǵnı, Meırambek Danıa koróldik teatrynda ómir boıy jumys isteı alady. Alaıda ártis óz erkimen jumystan shyǵýyna bolady. Aqshamnews.kz tilshisi álem moıyndaǵan teatrdyń ártisimen suhbattasty.
sýret: Dına Lıtpın/aqshamnews.kz
Meırambek Nazarǵojaev 1996 jyly Almaty oblysy İle aýdany, Qaraoı aýylynda dúnıege kelgen. Ol 2018 jyldan beri Danıa Koróldik teatrynda balet ártisi retinde óner kórsetip júr. Meırambek tipti eýropalyqtardyń ózine sırek buıyratyn múmkindikke, ıaǵnı ómirlik kelisimshartqa ıe ónerpaz.
"Baletti tańdaýyma tátem sebepker boldy"
Bala kezinde balettiń ıisi murnyna da barmaǵan aýyldyń qarapaıym, dop teýip ósken balasy Eýropaǵa aparar joldyń qalaı qalanǵany jaıly bylaısha áńgimeledi.
"Kishkentaıymda balet týraly túsinik múlde bolmady. Biraq aýylda kóp konsertte án aıtyp, dombyrada oınaıtynmyn. Farıda esimdi týysqan tátem: 'Meırambek, sen ónerge jaqynsyń, qazir irikteý júrip jatyr, baǵyńdy synap kór" dep. Almaty horeografıalyq ýchılıshesine jol siltegen bolatyn. Solaısha 2006 jyl sol oqý ornynyń stýdenti atanyp, oqýymdy qyzyl dıplommen bitirdim. Kóptegen dúnıejúzilik konkýrs pen festıváldiń júldegeri boldym. ", – deıdi Meırambek Nazarǵojaev.
sýret: instagram.com/meiram0l
Danıaǵa bastaǵan dańǵyl
Meırambek 2014 jyly ýchılısheni támámdap, 1 jyl Reseıde, 2 jyl Germanıada eńbek etip, Danıaǵa jol tartqan.
"Basty armanym - shetelde tájirıbeli horeograftardan bilim alý edi. Shetelge ketý múmkindigi bolsa, qalt jibermeýge tyrysatynmyn. Birge oqıtyn dosym Danıa Koróldik teatry jaıly kóp aıtatyn. Oǵan túsý oryndalmas armandaı kórinetin. Sebebi bul teatrǵa myńdaǵan adam óziniń CV-in (surriculum vitae - túıindeme - jýr.) jiberedi. Men de jiberip kórdim. Básekelestiktiń kóptigin eseptep, shaqyrtý kelmeıtin shyǵar degen edim. Alaıda bir kúni qarasam "jabyq qaralymǵa kelińiz" degen hat kelgen eken. Qýana ketip, dosymmen birge Danıaǵa baryp baǵymyzdy synap kóreıik dedik" deıdi ol.
Shaqyrtýǵa sharq ura qýanǵan Meırambek tarıhı teatrdy kem degende kózben kórip qaıtatynyn qanaǵat tutqan. Alaıda shyǵarmashylyq synaqtyń nátıjesi kútpegen jerden onyń oń jambasyna túsken.
"Jabyq qaralymda klasıkalyq jattyǵýlardy kórsettik. Sonan soń, bizdi fızıoterapevtke jiberdi. Ol bizdiń densaýlyǵymyzdy, býyndarymyzdy, jalpy denemizdi tekserip shyqty. Jaýabyn poshtaǵa jiberemiz degen soń, biz dosymyz ekeýmiz Danıany kórip qaıtqanymyzǵa, koróldik teatrda basqa ártistermen birge bolǵanymyzǵa rıza bolyp qaıttyq. Shyny kerek, teatrǵa qabyldanamyn dep oılamadym. Qazaqstanǵa barǵan soń elektron poshtama hat keldi. Sener-senbesimdi bilmedim. Ol kezde men aǵylshyn tilin asa bilmeıtinmin. Dosyma baryp, hatty oqytyp, bórkimdi aspanǵa attym. Sebebi bul - myńnan birine ǵana buıyra beretin múmkindik" deıdi Meırambek.
sýret: instagram.com/meiram0l
Teatrdaǵy jańa ómir qalaı bastaldy?
Meırambek Danıaǵa kóshkennen keıin ómiri qalaı ózgergeni jaıly áńgimelep berdi.
"Danıalyqtar - eń baqytty adamdar. Qıyn kezde janyńnan tabylyp, qoldaý kórsetýge daıyn turady. Ómir deńgeıi jaǵynan da bizden birshama alda tur. Bir kemshiligi - aýa raıynyń qubylmaly bolýy. 5 mınýt saıyn ózgeredi. Men tez úırenip kettim. Jańadan kelgender "kúnniń kózin kóresinder me?" dep tańǵalyp jatady. Óz basym qubylmaly aýa raıyn unatamyn. Teatrdaǵy tártipke de beıimdelý ońaı boldy. Bastysy úlken ynta bolsa boldy eken" dedi ol.
sýret: instagram.com/meiram0l
"Sahnada aıaq kıimim túsip qaldy"
Meırambek Nazarǵojaev sahnada óner kórsetý kezinde bolǵan qyzyqty jaıttardy áńgimelep berdi.
"Sahnada qyzyq jaıt kóp boldy. Birde bılep jatyp, baletke arnalǵan aıaq kıimim túsip qalǵany bar. Bári kúlip jatty. Men túr bermeı, bıimdi jalǵastyra berdim. Sahnanyń ortasynda bir aıaq kıim jatyr. Bári meniń aıaǵymnan túsip qalǵanyn túsindi. Baryp alaıyn deseń, mýzyka júrip jatyr. Amalsyz qoıylym bitkenshe sahnada jatty" deıdi Meırambek.
sýret: instagram.com/meiram0l
"Bolashaǵymdy Qazaqstanda kóremin"
Meırambek bolashaǵyn Qazaqstanmen baılanystyratynyn jáne otbasyn, týystaryn, tipti úıdiń tamaǵyn jıi saǵynatynyn aıtty. Onyń sózinshe, árbir qazaqstandyq qaıda júrse de, óz eliniń damýyna úlesin tıgizýi kerek. Meırambek óziniń Danıadaǵy tájirıbesin Qazaqstanda paıdalanýdy maqsat etip, osyndaı úlken armanyna alǵashqy qadamyn jasady. Osylaısha, úsh ǵasyrlyq tarıhy bar Danıa koróldik teatry 27 maýsym kúni tuńǵysh ret Qazaqstanǵa kelip, Almaty teatrynda qazaqstandyqtar úshin óner kórsetti.
"Basynda qorqynysh boldy, sebebi balet erekshe talǵamdy qajet etetin óner. Qoıylymdy kórermender qabyldaı ma, kelýshiler bola ma degen sıaqty kúmándar boldy. Biraq bastysy – ıdeıamyz júzege asyp, Danıa Koróldik teatrynyń ártisteri Almatyda alǵash ret óner kórsetip jatyr. Bul men úshin úlken jetistik. Sonymen qatar, osy tarıhı teatrdyń ártisteri Almaty horeografıalyq ýchılıshesiniń oqýshylaryna sheberlik saǵatyn ótkizdi. Bul da úlken nátıje" dedi Meırambek.
sýrette: Danıa Koróldik teatrynyń ártisteri
Aldaǵy ýaqytta Meırambek óziniń dostarymen birge birneshe jobany júzege asyryp, Qazaqstan mádenıetiniń damýyna úles qosýdy maqsat etip otyr. Onyń sózinshe, olardyń birlesken Nomad Ballet Project jobasy aıasynda birneshe qyzyqty bastamany júzege asyrý oıda bar.
"Aldaǵy ýaqytta elimiz úshin taǵy da birneshe jobany júzege asyratyn bolamyz. Sol úshin Qazaqstandyq dostarymmen birge Nomad Ballet Project degen jobany iske qosyp jatyrmyz. Bul jobanyń aıasynda birneshe mańyzdy jobany jaryqqa shyǵarsaq degen nıetimiz bar" dedi Nazarǵojaev.