Fransıanyń Parıj qalasynda shetelde turatyn otandastarymyzdyń qatysýymen «Eýropa qazaqtarynyń kezdesý-quryltaıy» ótip jatyr, dep habarlaıdy Almaty-akshamy.kz Inform.kz-ke silteme jasap.
Shara Qazaqstan Respýblıkasynyń Fransıadaǵy elshiligi men Fransıadaǵy Qazaq-Túrik qoǵamy, sonymen qatar «Otandastar qory» komersıalyq emes AQ-nyń atsalysýymen uıymdastyryldy. Kezdesý-quryltaıdyń alǵashqy kúninde Qazaqstannyń Fransıadaǵy Tótenshe jáne ókiletti elshisi Jan Galıev pen «Otandastar qory» KeAQ prezıdenti Abzal Saparbekuly uly tulǵalarǵa taǵzym etýge arnaıy bardy.
Atap aıtqanda, Alashtyń azattyq kúresiniń qaıratkeri Mustafa Shoqaı men hákim Abaıdyń eskertkishine baryp, quran baǵyshtady, gúl shoqtaryn qoıdy. M.Shoqaıdyń eskertkishi Parıj mańynda kezinde ózi turǵan úıdiń qasynda ornalasqan. Al Abaı atamyzdyń eskertkishi Parıjdiń dál ortasyndaǵy aqyndar saıabaǵynda boı kótergen.