Fýtboldan 2024 jylǵy Eýropa chempıonatynda toptyq kezeń aıaqtaldy. Toptyq kezeńdegi sońǵy eki oıyn F tobyndaǵy quramalar arasynda ótti, dep habarlaıdy almaty-akshamy.kz.
Alǵashqy eki oıynda bir de bir upaıdan shashaý shyǵarmaǵan Portýgalıa fýtbolshylary úshinshi týrda Grýzıamen kezdesti.
Bıyl tuńǵysh ret qurlyqtyq dodanyń fınaldyq satysyna shyqqan grýzıalyq qurama jarysty jalǵastyrý múmkindigin úze qoıǵan joq edi.
Sondyqtan azýly qarsylasymen kezdesýde tek qana jeńis olardy pleı-off satysyna alyp shyǵatyn.
Alǵashqy mınýttan Portýgalıa qaqpasyna lap qoıǵan olar jyldam gol soǵyp ketti. Olardyń qatarynan Hvıcha Kvarashelıa 2-mınýtta qaqpany dál kózdedi.
Al 57-mınýtta Jorj Mıkaýtadze qarsylas qaqpasyna belgilengen penaltıden múlt ketken joq.
Osylaısha Grýzıa qarsylasynan 2:0 esebimen basym túsip, pleı-off satysyna joldama aldy.
Olar Portýgalıany óz tarıhynda alǵash ret jeńdi.
Taǵy bir kezdesýde Chehıa men Túrkıa sheberlik baıqasty. Oıynnyń 20-mınýtynda chehıalyq Antonın Barak qyzyl qaǵaz alyp, alańnan qýylyp ketti.
Túrkıalyq Hakan Chalhanoglý 51-mınýtta Chehıa qaqpasynan sańylaý taýyp, óz quramasyn alǵa shyǵardy.
Chehıalyq fýtbolshylar da qarap qalǵan joq. Oıynnyń 66-mınýtynda olardyń qatarynan Tomash Soýchek tarazy basyn teńestirip ketti.
Túrkıalyq Djenk Tosýn 94-mınýtta qorytyndy esepti belgiledi.
Kezdesýde Túrkıa Chehıany 2:1 esebimen jeńip ketti.
Qurlyqtyq dodanyń pleı-off satysynda Ispanıa men Grýzıa, Germanıa men Danıa, Portýgalıa men Slovenıa, Fransıa men Belgıa, Rýmynıa men Nıderland, Avstrıa men Túrkıa, Anglıa men Slovakıa, Shveısarıa men Italıa sheberlik baıqasady.
Jarystyń atalǵan satysyndaǵy oıyndar 29 maýsym men 2 shilde aralyǵynda ótkiziledi.