Prezıdenttiń BAQ salasy qyzmetkerlerin marapattaý rásiminde sóılegen sózinen negizgi oılar:
– Biz árbir sózimizdi qoǵamdy túzeýge jumsasaq, bolashaǵymyz da baıandy bolary haq;
– Jurtty nashaqorlyq pen qumarpazdyqtan, turmystyq zorlyq-zombylyqtan, vandalızm men ysyrapshyldyqtan qorǵaý – ortaq mindet;
– Reformalar, ózgerister áli de jalǵasa beredi. Eń bastysy, bul ózgerister – halyqtyń tańdaýy;
– Zań jazalaý úshin emes, eń aldymen, quqyqtyq mádenıetti qalyptastyrý úshin mańyzdy. Oǵan búkil qoǵam bolyp atsalysý qajet;
– Depýtat pen jýrnalıs qyzmeti biri-birimen tyǵyz baılanysyp jatyr. Ekeýi de el múddesin qorǵaıdy. Halyq senimin arqalap, oǵan múltiksiz qyzmet etedi;
– Búginde otandyq jýrnalısıka myqty qoǵamdyq ınstıtýtqa, naǵyz tórtinshi bılikke aınaldy. Bul salanyń osynaý mańyzdy iske qosar úlesi zor;
– Otandyq medıa qoǵamda joǵary ekologıalyq sana men tabıǵatty aıalaý mádenıetin qalyptastyrýǵa zor kómegin tıgize alady;
– BAQ ókilderiniń taǵy bir mańyzdy mısıasy – azamattarǵa ekonomıkanyń damýy týraly jan-jaqty jáne keńinen aqparat berý. Bul rette aýyz toltyryp aıtatyn dúnıe jetkilikti;
– Jaǵymdy aqparat laıyqty deńgeıde taralmaı jatady. Jaqsyny jaqsy dep aıtý kerek. El damýyndaǵy oń ózgeristerge kóbirek nazar aýdarý buqaralyq aqparat quraldarynyń, ásirese, memlekettik BAQ-tyń mindeti dep sanaımyn;
– Elimiz bıyl SHYU-dan basqa taǵy bes halyqaralyq qurylymǵa tóraǵalyq etip otyr. Bul – qazaq dıplomatıasynyń tarıhynda buryn-sońdy bolmaǵan jetistik;
– Qazaqstanda áldeqashan jańa saıası jaǵdaı qalyptasty. Ony sóz bostandyǵynan, ashyq básekelestikten, bılik pen qoǵam arasyndaǵy konstrýktıvti dıalogtan, búkil aqparattyq resýrstardyń qol jetimdiliginen baıqaýǵa bolady;
– Qazir jańa medıa dáýiri bastaldy. Buqaralyq aqparat quraldary jasandy ıntellekt tehnologıasyn tıimdi paıdalanyp jatyr. Muny shyn máninde jańashyldyq pen jasampazdyqtyń kórinisi deýge bolady;
– Gazet shyǵarý jáne gazet oqý úrdisi eshqashan úzilmeýge tıis. Osy sabaqtastyqty saqtap qalý kerek. Bul – órkenıetti elderdiń barlyǵynda qalyptasqan dástúr.