Eýrazıadaǵy yntymaqtastyq ekonomıkalyq baǵyt boıynsha damýy tıis, - dedi Memleket basshysy Qasym-Jomart Toqaev Soltústik Qazaqstan oblysynyń aýyl sharýashylyǵy ónimderin óndirýshilermen kezdesý barysynda.
«Reseı Federasıasymen shekara boıynda ornalasqan Soltústik Qazaqstan oblysynyń strategıalyq mańyzy zor. Reseı – bizdiń seriktesimiz. Biz EAEO aıasynda da, ekijaqty deńgeıde de kedergisiz saýda men taýar almasý isin qamtamasyz etý úshin turaqty kelissózder júrgizemiz. Jýyrda Máskeýde EAEO Joǵary Keńesiniń otyrysy ótti. Jıynda, eń aldymen, ózara ekonomıkalyq is-áreket, ıntegrasıa, yntymaqtastyq máselelerimen aınalysý qajettigi týraly aıttyq. Saýda-sattyq kedergisiz júrgizilýi kerek. Biz biryńǵaı taýar naryǵyn qurýǵa bar kúsh-jigerimizdi jumsaýǵa tıispiz. Qazaqstandyq júk tasymaldaýshylar taýardy Reseı naryǵyna da, úshinshi memleketterdiń naryqtaryna da kedergisiz jáne tıimdi jetkizý úshin Reseı aýmaǵyndaǵy ishki temirjol tarıfteri qol jetimdi bolýǵa tıis. Taǵy da qaıtalap aıtamyn: EAEO, eń aldymen, ekonomıkalyq ıntegrasıamen, sodan keıin basqa máselelermen aınalysýy kerek», - dedi Qasym-Jomart Toqaev Soltústik Qazaqstan oblysynyń aýyl sharýashylyǵy ónimderin óndirýshilermen kezdesý barysynda.
Memleket basshysynyń atap ótýinshe, ıdeologıa, bilim berý, densaýlyq saqtaý, sport, mádenıet salalaryndaǵy máseleler, árıne, nazar aýdarýdy qajet etedi. Biraq basqa da platformalar bar.
«Onda biz barlyq tıisti eldermen tabysty yntymaqtastyq ornatqanbyz. Sondyqtan EAEO, eń aldymen, 2015 jylǵy Shartta bekitilgen mindetin oryndaıdy dep senemiz», - dedi Prezıdent.