Jańa Salyq kodeksiniń jobasyn tanystyrǵan Ulttyq ekonomıka vıse-mınıstri Azamat Ámrın 10 jyldan asqan avtokólikter úshin salyq somasy 30%-ǵa, 20 jyldan asqan avtokólikter úshin – 50%-ǵa tómendeıtinin aıtty, dep habarlaıdy aqshamnews.kz.
«Jańa Salyq kodeksinde BJZQ-dan zeınetaqy tólemderin jeke tabys salyǵynan bosatý jónindegi norma kózdelgen. Sondaı-aq, qoldanýy 10 jyldan asqan avtomobılder úshin salyq somasy 30%-ǵa, 20 jyldan asqan avtomobılder úshin – 50%-ǵa tómendetiletin bolady»,- dedi mınıstrlik ókili.
Sonymen birge burynna talqylanyp kele jatqan «Sán-saltanat» zattaryna joǵary salyq salý jónindegi mindetterdi iske asyrý úshin jańa tetikter usynylǵan. Olar kelesideı:
- jıyntyq quny 450 mln teńgeden asatyn jyljymaıtyn múlik obektileri boıynsha múlik salyǵynyń joǵary mólsherlemesi artady;
- kedendik quny 75 mln teńgeden asatyn jeńil avtomobılderge aksızben qosymsha salyq salynady;
- qymbat alkogól jáne temeki ónimderine, sondaı-aq qymbat teńiz kemelerine, ushý apparattaryna aksızben qosymsha salyq salynady.
Sonymen birge shaǵyn bızneske qatysty arnaı salyq rejımderin reformalaý kózdelgen. Jańa jobada ol rejımder ońtaılandyrylyp, tek 3 rejım qalady.
Birinshisi – ózin-ózi jumyspen qamtyǵandar úshin jańa jeńildikti rejım usynylady, onda JTS mólsherlemesi nólge teń. Tabystyń shekti máni – jylyna 15 mln teńgeden aspaıdy. Jeke kásipker retinde tirkelý qajet emes. Mólsherleme aınalymnan 4%. Olar 2% – MJA, 1% – ÁMSM, 1% – ÁSMQ.
Ekinshisi – ońtaılandyrǵan deklarasıa negizindegi ASR. Máslıhattardyń mólsherlemesi 2%-ǵa deıin tómendetý quqyǵyn saqtaı otyryp, V2S operasıalary úshin 4%-dyq mólsherleme, sondaı-aq V2V operasıalary úshin 12%-dyq mólsherleme. Al aınalym boıynsha usynylatyn shekti mán – jylyna 600 myń AEK. Osy ASR qoldaný úshin qyzmet túrlerine tyıym salý tizimi usynylady.
«Jumysshylar sany shektelmeıdi. Sondaı-aq, osy rejımdi qoldanatyn salyq tóleýshiler QQS tólemeıdi»- deıdi Ámrın.
Úshinshi rejım – sharýa jáne fermer qojalyqtary úshin rejımdi sol kúıinde saqtaý usynylady. Tek biryńǵaı jer salyǵynyń ornyna JTS tólenbek. Osy rejım úshin tıimsiz paıdalanylǵan jerler boıynsha jer salyǵyn bazalyq mólsherlemeden 40 ese mólsherde engizý usynylǵan.