«Almaty Ustazy» baıqaýy bıyl tórtinshi márte ótip jatyr. Almaty qalasy ákimdiginiń qoldaýymen, «Bilimdi ult» sapaly bilim berý» ulttyq jobasynyń maqsattary men mindetterine sáıkes ótkizilip jatqan baıqaýdyń maqsaty – pedagogterdiń talanty men shyǵarmashylyq áleýetin anyqtaý, ozyq pedagogıkalyq tájirıbeni taratý, pedagog mártebesin arttyrý.
Iá, «Almaty Ustazy» talantty jáne shyǵarmashylyqpen jumys isteıtin jas muǵalimderdi anyqtaýǵa jáne qoldaýǵa, pedagogterdiń bedelin kóterýge jáne nasıhattaýǵa baǵyttalǵan. Mundaı baıqaý qalanyń jas pedagogteri arasynda ózekti jáne suranysqa ıe, óıtkeni bul alańda kóptegen paıdaly aqparat alýǵa, jańa ádister men tehnologıalar týraly bilýge, bilimderi men qabiletterin kórsetýge jáne tekserýge bolady.
Sonymen, «Almaty Ustazy» baıqaýy 3 kezeńde ótýde. Bıyl oǵan 1513 jas pedagog tirkelip, 780 muǵalim óz materıaldaryn júktedi. Birinshi kezeń onlaın rejıminde «Almaty Ustazy» baıqaýynyń uzdikustaz-nobd.edu.kz elektrondyq platformasynda ótti. Onda 11 oqý páni boıynsha 158 mektepten 780 pedagog óz jumystaryn usyndy. Qatysýshylardyń jumysyn 70 sarapshy baǵalady. Baıqaýdyń irikteý qorytyndysy boıynsha ekinshi kezeńge sarapshylar ártúrli pánder boıynsha 110 qatysýshyny jiberdi. Olar bıylǵy mamyrda 20 mektep bazasynda baıqaý sabaqtar ótkizdi.
– Endi úshinshi, qorytyndy kezeń 20 qyrkúıekte Alataý aýdanynyń Inovasıalar jáne shyǵarmashylyq ortalyǵynda ótedi. Onda qalanyń oza shapqan úzdik 12 pedagogi 11 oqý páni boıynsha ózderiniń jobalyq jumystaryn usynady. Sońǵy kezeń eki bólimnen turady, ıaǵnı «Men – muǵalim kóshbasshymyn» jobasyn qorǵaý jáne «Qazirgi bilim berýdiń ózekti mindetteri» taqyrybyndaǵy pikirtalas. Sońǵy kezeńdi pán boıynsha komısıa tóraǵalary jáne Almaty qalasy Bilim basqarmasynyń basshysy Saıfedenov Saıran Tapenuly baǵalaıtyn bolady. Fınalısterdiń alty jeńimpazy halyqaralyq bilim berý taǵylymdamasyna bara alady, onda mektepterdiń jumysymen tanysady jáne sheteldik bilim berý mekemeleriniń jumysynda praktıkalyq tájirıbe jınaqtaıdy, – deıdi Almaty qalasy Bilim basqarmasynyń ókili Dáýlet Baısultanov.
Jeńimpazdar Muǵalimder kúnine oraı 4 qazanda Respýblıka saraıynda saltanatty jaǵdaıda marapattalady. Al gran-prı ıegerine 5 000 000 teńgeniń sertıfıkaty tabystalady.