17 qazan 2024 jyly Astanada «Esirtkisiz bolashaq» atty dóńgelek ústel ótti. Bul shara esirtki qylmysy úshin negizsiz sottalǵan jastardyń máselelerin talqylaýǵa arnalǵan mańyzdy jıyn boldy. Oǵan esirtki qylmysy boıynsha sottalǵan azamattardyń ata-analary men týystary, zańgerler, quqyq qorǵaý organdarynyń ókilderi jáne qoǵam qaıratkerleri qatysty. Jıynda ata-analar jastardyń bilmestikpen nemese qysym kórip, esirtki bıznesine aralasyp, uzaq merzimge sottalyp jatqanyn aıtyp, memleket pen qoǵamnan ádilettilikti talap etti.
Ata-analardyń aıtýynsha, esirtki qylmysynyń naǵyz uıymdastyrýshylary zańnan tys qalyp, qylmystyq júıeniń aýyrtpalyǵyn jasóspirimder men jastar kóterip otyr. Qoǵamnyń bul ádiletsizdikke nazar aýdarýy – qylmystyq zańnamany qaıta qarap, ár isti muqıat zertteýge jáne jastarǵa ádil jaza taǵaıyndaýǵa shaqyrý. Jastardyń bolashaǵyn saqtaý jáne olarǵa ekinshi múmkindik berý – ata-analardyń basty maqsaty.
Zańdy jetildirý qajettiligi
Ata-analar, zańgerler men qoǵam qaıratkerleri esirtki qylmysyna qatysty zańnamany jetildirý kerektigin usyndy. Birinshi ret qylmys jasaǵan jastarǵa qatysty jazany jeńildetý jáne esirtki saýdasyn uıymdastyrýshylarǵa qatysty sharalardy kúsheıtý týraly usynystar kópshiliktiń qoldaýyna ıe boldy. Bul usynystar jasóspirimder men jastardy zańdy durys túsinýge, olardy qylmystyq áreketterden qorǵaýǵa baǵyttalǵan.
Zańgerlerdiń pikirinshe, qazirgi zańnamada jastarǵa qatysty ádildikke jetý úshin birqatar ózgerister engizý qajet. Jas adamdar kóbinese jaǵdaıdy tolyq túsinbeı, qysymǵa ushyrap, qylmys jasaýǵa májbúr bolady. Mundaı jaǵdaıda birinshi ret qylmys jasaǵandarǵa qatysty gýmanısik kózqaras pen keshirim mańyzdy ról atqarýy tıis.
Jastardy qorǵaý – qoǵamnyń mindeti
Dóńgelek ústel barysynda jastardyń esirtki bıznesine aralasýyn aldyn alý, quqyqtyq bilim berý jáne profılaktıkalyq sharalar týraly da sóz qozǵaldy. Qoǵam qaıratkerleri jastardy qylmysqa ıtermeleıtin faktorlarmen kúresýdiń mańyzdylyǵyn atap ótti. Bilim berý mekemeleri men quqyq qorǵaý organdary arasyndaǵy yntymaqtastyqty kúsheıtý arqyly jastardy esirtki qylmysynan qorǵaý jáne olarǵa durys baǵyt berý múmkindigi joǵary bolmaq.
Bolashaqqa senim
«Esirtkisiz bolashaq» atty dóńgelek ústeldiń qatysýshylary jastardyń bolashaǵyna qatysty úlken jaýapkershilik alyp, olardy ádiletsizdikten qorǵaý úshin birlese jumys isteýge daıyn ekendikterin bildirdi. Ata-analar memleketten zańnamany jetildirip, qylmystyq isterdi ádil qaraýdy talap etedi. Al qoǵam qaıratkerleri jastardyń taǵdyry úshin kúresti jalǵastyratynyn aıtady.
Jastar – bizdiń bolashaǵymyz. Olardyń qatelikterine keshirimmen qarap, durys baǵyt siltep, ekinshi múmkindik berý – qoǵamnyń basty mindeti. Esirtkisiz bolashaq qurý jolynda barsha qazaqstandyqtardyń birlesken áreketi qajet.