№199 mektepte Almaty máslıhatynyń VII shaqyrylymyndaǵy Amanat partıasy depýtattarynyń atqarylǵan jumystary týraly eseptik kezdesýi ótti.
Bostandyq aýdany turǵyndarynyń aldynda Almaty máslıhatynyń burynǵy depýtaty Dıana Erlan atqarylǵan jumystar týraly baıandady.
«Men Bostandyq aýdanynyń turǵynymyn jáne ótken jyldyń shilde aıynan bastap Almaty qalasy máslıhatynyń quramynda boldym. Depýtattyq qyzmette jarty jyl bolǵanyma qaramastan, men jurtshylyqpen ashyq dıalog júrgizýge jáne depýtattyq korpýs jumysynyń nátıjelerimen bólisýge daıynmyn», – dedi ol.
Almaty máslıhatynyń depýtaty Bostandyq aýdanynda 7 myńnan astam erekshe qajettiligi bar adamdar bar ekenin aıtyp, olar úshin áleýmettik ınfraqurylymnyń qoljetimdiligi baǵytynda birqatar jumystar atqarylǵanyn aıtty.
«Ótken jyldyń tamyz aıynda meni sóıleý qabileti buzylǵan oqýshylarǵa arnalǵan №9 mektep-ınternattyń partıalyq baqylaýshysy etip taǵaıyndady. Internat bizdiń aýdanda ornalasqan, biraq bul - Almatydaǵy osyndaı dıagnozy bar balalarǵa arnalǵan jalǵyz oqý orny. Merdigerdiń josyqsyz qarym-qatynasy men kóptegen sot prosesterine baılanysty ǵımaratty jóndeý-qurylys jumystarynyń merzimi 4 jylǵa sozyldy.
Men 139 oqýshy osy ýaqyt ishinde qalanyń basqa eki mektebinde oqýǵa májbúr bolǵanyn anyqtadym. Bul múldem durys emes. Birinshiden, bul eki mektep úshin aýyrtpalyq. Ekinshiden, ata-analar qolaısyz marshrýtpen júrýge májbúr. Úshinshiden, bul balalardyń ózderi úshin yńǵaısyzdyq týdyrady. Sondyqtan men aldymen aýdan ákimine júgindim. Budan ary másele týraly qala ákimi habardar bolyp, aldyńǵy aptada mekemeniń qurylys jumysymen jeke ózi tanysty. Osyndaı qoldaýdyń nátıjesinde mektep jańa oqý jylynan bastap ashylady», – dedi D.Erlan.
Qalalyq máslıhattyń burynǵy depýtaty sóz sońynda elimizdegi saıası reformalar jaıly óz oıyn bildirdi.
«Almaty máslıhatynyń VII shaqyrylymynyń taratylýy men úshin jáne meniń áriptesterim úshin kútpegen jaıt boldy dep aıta almaımyn. Bul Memleket basshysynyń saıası reformalary aıasynda zańdy túrde oryn aldy», – dedi ol.