Senator Ernur Áıtkenov Pavlodar oblysyndaǵy Aqsý qalasy men Maı aýdanynyń Malaısary aýylynyń turǵyndarymen kezdesý barysynda elimizde atom elektr stansasyn salý máselesin talqylady. Bul kezdesýler barysynda depýtat turǵyndarmen pikir almasyp, AES qurylysynyń elimizdiń bolashaǵy úshin strategıalyq mańyzy bar ekenin túsindirdi.
Aqsý qalasynyń áleýmettik jáne sport salasynyń ujymdarymen, sondaı-aq Malaısary kentiniń turǵyndarymen ótken kezdesýlerde senator Áıtkenov AES salý jobasynyń el úshin mańyzy zor ekenin atap ótti. «AES salý – Qazaqstannyń energetıkalyq táýelsizdigin nyǵaıtýǵa baǵyttalǵan strategıalyq qadam. Prezıdentimiz Qasym-Jomart Toqaev mańyzdy sheshimder qabyldap, azamattardyń pikirin eskere otyryp, jalpyulttyq referendým ótkizýdi maquldady. Bul elimizdiń «Halyq únine qulaq asatyn memleket» tujyrymdamasynyń naqty iske asýynyń jarqyn mysaly», – dedi Ernur Áıtkenov.
Senator sonymen qatar halyqtyń bir bóligi endi qolǵa alynǵaly otyrǵan jańa salalarǵa qatysty alańdaýy múmkin ekenin atap ótip, osy oraıda jobanyń negizgi jaqtaryn jan-jaqty túsindirdi. Ol turǵyndardan túsken kókeıkesti saýaldarǵa jaýap berip, jobanyń uzaq merzimdi ekologıalyq jáne ekonomıkalyq tıimdiligine toqtaldy.
Kezdesýde Ernur Áıtkenov turǵyndardy 2024 jyldyń 6 qazanynda ótetin referendýmǵa belsendi qatysýǵa shaqyryp, árbir azamattyń daýysy mańyzdy ekenin aıtty. Aqsý qalasy men Malaısary aýylynyń turǵyndary óz kezeginde Prezıdent bastamalaryna qoldaý bildirip, jobaǵa qatysty óz usynystary men tilekterin jetkizdi. Kezdesý barysynda elimizdiń turaqty damýyn qamtamasyz etý úshin árbir azamattyń sanaly tańdaýynyń mańyzdylyǵy erekshe atap ótildi.