Parlament Senatynyń Tóraǵasy Máýlen Áshimbaev bastaǵan AES salýdy qoldaý jónindegi halyq shtaby Abaı oblysynda jumysyn jalǵastyrdy, dep habarlaıdy aqshamnews.kz
Shtab quramynda depýtattar, sarapshylar jáne belsendi azamattar bar. Olar aldaǵy referendýmǵa baılanysty aqparattyq-túsindirý jumystaryn júrgizý aıasynda aýylsharýashylyq ónimderin óndirýshilermen, bilim berý salasynyń mamandarymen jáne komýnaldyq qyzmetter salasyndaǵy eńbek ujymdarymen kezdesý ótkizdi. Kezdesýlerde ekologıalyq jáne ekonomıkalyq problemalardy sheshý turǵysynan AES salýdyń mańyzy talqylandy.
Máýlen Áshimbaev óz sózinde qazirgi tańda álem klımattyń ózgerýi jáne ekologıanyń nasharlaýy sıaqty túrli syn-qaterlermen betpe-bet kelip otyrǵanyn atap ótti. Sonymen qatar, ol elektr energıasynyń tapshylyǵynyń kún sanap artyp kele jatqanyn tilge tıek etti. Búgingi kúni Qazaqstanda óndiriletin energıanyń 70 paıyzdan astamy kómir elektr stansalaryna táýeldi. Osyǵan oraı, energıa óndirisin arttyrýmen birge, onyń ekologıaǵa tıgizetin zıanyn azaıtýdyń mańyzdylyǵy aıtyldy. Bul rette atom elektr stansıasyn salý eń tıimdi sheshimderdiń biri retinde qarastyrylýda.
Shtab músheleri «Prırechnoe agrofırmasy» JSHS bazasynda oblystaǵy aýylsharýashylyq ónimderin óndirýshilermen kezdesý ótkizdi. Sonymen qatar, «Eıkos» JSHS kásipkerlerimen jáne qyzmetkerlerimen, sondaı-aq komýnaldyq sektor kásiporyndarynyń ujymdarymen de kezdesýler uıymdastyrylyp, atalǵan máseleler keńinen talqylandy.
«Memleket basshysy Qasym-Jomart Toqaevtyń bastamasymen 6 qazanda Qazaqstanda AES salý máselesine qatysty respýblıkalyq referendým ótedi. Atom elektr stansıasy – kómirqyshqyl gazynyń shyǵaryndylaryn jáne kómirge táýeldilikti azaıtýdyń eń tıimdi joldarynyń biri. AES-tiń kómir elektr stansıalarynan aıyrmashylyǵy zor. Atom energetıkasy qorshaǵan ortany ýly gazdarmen, kúlmen nemese zıandy qaldyqtarmen lastamaıdy. Bul – atom energıasynyń tabıǵatqa zıan keltirmeı, elimizdiń ekonomıkasyn damytýǵa serpin beretin taza jáne turaqty energıa kózimen qamtamasyz etý degen sóz», – dep atap ótti Máýlen Áshimbaev.