Senator Rýslan Rústemov atom elektr stansıalarynyń qurylysy elimizdiń energetıkalyq bolashaǵy úshin mańyzdy qadam ekenin atap ótti. Onyń pikirinshe, AES tek energıa kózin qamtamasyz etip qana qoımaı, ekonomıkany damytýdyń negizgi draıverine aınalýy múmkin.
«Atom elektr stansıalarynyń qurylysy jańa jumys oryndaryn ashýǵa, zamanaýı tehnologıalardy engizýge jáne elimizdiń turaqty energetıkalyq bolashaǵyn qamtamasyz etýge septigin tıgizedi. Bul ekonomıkany nyǵaıtyp qana qoımaı, elektr qýatynyń tapshylyǵyn sheshýdiń bir joly bolmaq», – deıdi Rýslan Rústemov.
Sonymen qatar, ol AES-tiń elimiz úshin ekologıalyq taza jáne uzaq merzimdi senimdi energıa kózi ekenin de erekshe atap ótti.
«Qazaqstannyń alǵa qoıǵan maqsattaryna qol jetkizý úshin atom energetıkasy strategıalyq qadam bolady, bul bizdiń eldiń turaqty damýyna úlken úles qosady», – dep qorytyndylady senator.