AES-te jylý balansy degen uǵym bar, ol temperatýrany retteý úshin qajet. Jylýdy alý úshin arnaıy gradırnálar qoldanylady, sol sebepti atom elektr stansıalarynyń janynda turǵan úlken murjalardan aq bý shyǵady — bul artyq jylýdyń saldary.
Balqash kóliniń ózi jyl saıyn shamamen 1,5 metr býlanyp otyrady, biraq áli kúnge deıin tolyq qurǵaǵan joq. Al atom stansıasy kólden tek tabıǵı býlanatyn sýdyń 0,32%-yn ǵana paıdalanady. Bul óte az kólem, sondyqtan ol Balqashtyń sý deńgeıine eshqandaı áser etpeıdi. Sonymen qatar, álemde eshbir sý qoımasy atom stansıasy saldarynan keýip qalmaǵan. Kerisinshe, mundaı aımaqtarda balyq sharýashylyǵy damyp, balyq aýlaý ónerkásibi gúldenip, halyqaralyq sporttyq balyq aýlaý týrnırleri ótkiziledi.
AES-ti sý qoımalarynyń janynda salý — álemdik tájirıbede qalypty jaǵdaı. Balqash kóliniń sýy stansıany tek salqyndatý úshin paıdalanylady, al eshqandaı paıdalanylǵan sý qaıtadan kólge quıylmaıdy. Sý tek bir jaqty qoldanylady.
Sonymen qatar, radıasıanyń kólge túsý qaýpi múldem joq, tipti avarıa bolǵan jaǵdaıda da. AES-te eki jabyq sý kontýry qoldanylady: birinshi kontýr reaktormen baılanysta jáne tolyqtaı oqshaýlanǵan. Al ekinshi kontýr — kádimgi sý, ol jylytylady, býǵa aınalyp, týrbınany aınaldyryp, elektr energıasyn óndiredi, sodan keıin qaıta salqyndatylady. Bul eki kontýr eshqashan bir-birimen qıylyspaıdy, sol sebepti ekologıaǵa qaýip tóndirmeıdi.
Atom energıasy — bul turaqty jáne ekologıalyq taza energıa kózi. Qazaqstannyń energıa qajettiligin qamtamasyz etý úshin osy salany durys túsiný jáne damytý óte mańyzdy.