Aýstrıada ótken parlament saılaýyna alǵash ret elimizdiń ókili, Ortalyq saılaý komısıasynyń tóraǵasy Nurlan Ábdirov baıqaýshy retinde qatysyp, eýropalyq saılaý úlgisin kórip qaıtty.
Parlamentiniń tómengi palatasyna 183 depýtatty saılaý úshin el aýmaǵynda 10 myńǵa jýyq saılaý ýchaskesi uıymdastyrylyp, oǵan 6,3 mln turǵyn kelip daýys berdi, dep habarlaıdy aqshamnews.kz.
Eldiń joǵarǵy zań shyǵarýshy organyna kirý úshin 11 partıa keminde 4 paıyz daýys jınaýy kerek bolatyn. Aldyn ala nátıje boıynsha 29,1% daýys jınaǵan ásireońshyl Erkindik partıasy alǵashqy orynda tur. Ekinshi orynda – 26,2% jınaǵan Aýstrıa Halyq partıasy. Sosıal-demokratıalyq partıa 20,4% daýyspen úzdik úshtikti túıindep tur.
Aýstrıalyq taraptyń shaqyrýymen alǵash ret bizdiń elden barǵan ókil N.Ábdirov bul saıası naýqannan birqatar jańashyldyqty baıqaǵanyn jetkizdi.
«Vena qalasynda birsypyra saılaý ýchaskelerinde boldym. Daýys berý úderisi jaqsy dengeıde ótti. Kelgen adamdardyń basym kóbi egde jastaǵylar ekenin baıqadym. Komısıa da óz jumysyn tıisti deńgeıde atqardy», dep oıymen bólisti ol.
Venadaǵy Saılaý ýchaskesiniń tóraǵasy Marsel Fýshıbega bıyl alǵash ret Qazaqstannan baıqaýshynyń kelýi bir jaǵynan ózin tańǵaldyrsa, ekinshi jaǵynan jańa elderdiń bul naýqanǵa qyzyǵýshylyq tanyta bastaǵany qýantqanyn jetkizdi.
«Men bul jerde 11 jyldan beri jumys isteımin. Bıyl alǵash ret Qazaqstannan baıqaýshynyń kelýi Saılaý ýchaskesiniń tóraǵasy retinde meni qatty qýantady», - dedi ol.
Aýstrıadaǵy saılaý júıesiniń ózine tán birqatar ereksheligi bar. Máselen, keıingi jyldary engizilgen ózgeristerdiń biri – poshta arqyly daýys berý, sondaı-aq daýys berýshilerdiń jasyn tómendetý.
«Ótken saılaýda 1 mıllıon adam poshtamen daýys bergen. Al bıyl 1,5 mıllıon adam osy jolmen daýys berýge júginipti. Sonymen qatar daýys berý jasyn 18-den 16 jasqa deıin tómendetken. Bul saıası úderisterge jastardy kóbirek tartý maqsatynda jasalyp otyr», - deıdi Ortalyq saılaý komısıasynyń tóraǵasy N.Ábdirov.
Venaǵa jumys sapary aıasynda ol Aýstrıanyń federaldyq saılaý júıesiniń basshysy Gregor Vendamen kezdesti.
«Biz aldaǵy ýaqytta osy memlekettiń saılaý organymen ózara qarym-qatynasymyzdy damytýǵa ýádelestik. Gregor Venda myrzamen kezdesýimiz nátıjeli boldy», dedi N.Ábdirov.
Aıta ketsek, Aýstrıadaǵy saılaý ýchaskeleri keshe jergilikti ýaqyt boıynsha saǵat 17.00-de jabylyp, parlamenttik saılaýdyń aldyn ala nátıjeleri jarıalandy. Al resmı nátıje 16 qazanda málim bolmaq.