Qazaqstanda atom elektr stansıasyn salý jónindegi referendým jaqyndap kele jatqanda, bul taqyryp qoǵamda qyzý talqyǵa túsýde. Ártúrli pikirler bar, keıbireýler AES-tiń qaýipsizdigine kúmán keltiredi. Biraq men aıtarym, atom energetıkasy biz úshin damý jolyndaǵy asa mańyzdy qadam.
Qaýipsizdik máselesi
Qoǵamda oryn alǵan Chernobyl men Fýkýsıma sıaqty oqıǵalardan keıin atom energetıkasyna degen senimniń tómen ekeni túsinikti. Biraq qazirgi zamanǵy III jáne III+ býyn reaktorlary burynǵy reaktorlarǵa qaraǵanda áldeqaıda qaýipsiz. Olar belsendi jáne pasıvti qaýipsizdik júıelerimen jabdyqtalǵan, bul júıeler kez kelgen jaǵdaıǵa derbes jaýap bere alady. Osylaısha, aýyr apattyń yqtımaldyǵy is júzinde nólge teń. Qazirgi tańda álem boıynsha aýyr apattyń bolýynyń yqtımaldyǵy 10 mıllıon jyl ishinde bir oqıǵadan aspaıdy dep baǵalanýda.
Kómir JEO-lary men ekologıa
Kóp adam atom elektr stansıasynyń qaýipsiz emestigin aıtady, biraq olar kómirmen jumys isteıtin JEO-lardyń qanshalyqty qaýipti ekenin túsinbeıdi. Kómir jaǵý kezinde jyl saıyn 40-60 mıllıon tonna ýly kúl qaldyrady, onyń quramynda ýran, stronsıı, radıı, myshák sıaqty qaýipti elementter bar. Eger ekologıalyq talaptardy qatań oryndap, shyǵaryndylardy tazartý jáne zolootvaldardy qalpyna keltirý jumystaryn jasasaq, bir kılovatt elektr energıasynyń quny atom stansıasynan qymbatqa túsedi.
Atom energetıkasy — bolashaqqa qadam
Atom energetıkasynsyz elimiz alǵa jyljı almaıdy. Tehnologıa damyp, jańa zaman talaptaryna saı ózgerister jasaý kerek. Parovozdardan teplovozdarǵa kóshý sıaqty, qazir de biz ekologıalyq taza jáne tıimdi energıa kózderine kóshýimiz qajet. Atom energetıkasy — turaqty energıa kózi, ol kún raıyna nemese basqa faktorlarǵa táýelsiz, úzilissiz elektr energıasyn óndiredi. Bul elimizdiń turaqty damýy úshin mańyzdy qadam.
Qazaqstanda atom energetıkasyn damytý arqyly biz ekologıalyq jaǵdaıdy jaqsartýǵa, energetıkalyq táýelsizdigimizdi qamtamasyz etýge jáne bolashaq urpaq úshin jańa múmkindikter ashýǵa úlken qadam jasaımyz. Halyqtyń qoldaýy — elimiz úshin mańyzdy. Keleshek úshin durys sheshim qabyldaıyq!