Túrkistan óńirindegi toǵyz adam jan tapsyrǵan joıqyn jol apaty týraly búkil el qulaǵdar boldy.
Sol jantúrshigerlik apattan aman qalyp, eshqandaı medısınalyq kómekke júginbegen eki azamattyń biri – Murat Esenqabylov janyp jatqan kólikterdiń ishinen segiz adamdy kóterip alyp shyqqan, dep habarlaıdy Almaty-akshamy.kz
Ol Túrkistan oblysy Sozaq aýdanyna qarasty Babata aýylynyń turǵyny.
"Toǵyz adam kóz aldymda jan tapsyrdy. Úsheýi mylja-myljasy shyqqan kóliktiń ishinde qysylyp, shyǵa almaı, janyp ketti. Qaısysyn qutqararymdy bilmedim. Janyp jatqan kólikterdiń ishinen segiz adamdy kóterip alyp shyqtym. Keıinnen kelgen adamdar janyp jatqan kólikke jaqyndaýǵa seskenip turdy. Sebebi, janyp jatqan kóliktiń janarmaı bagy kez-kelgen sátte atylyp ketýi múmkin edi. Yńyrsyp jylap, keıbiri esin bilmeı jatqan, dármensiz jaralylardy kólikten kóterip shyǵaryp, kezeń-kezeńimen jol jıegine qaýipsiz jerge tasydym", - deıdi Murat.
Bul týraly aqyn Maraltaı Raıymbekuly FB paraqshasyna: «Qazaqstan Respýblıkasynyń bıligi osynaý oqıǵanyń tergeý jumystaryn óz tarapynan qatań qadaǵalaýǵa alyp, ádil saraptama, oń sheshim shyǵýyn qamtamasyz etýmen qatar: "Er joldasy – táýekel!" - dep, esh oılanbastan, kózsiz batyrlyqqa barǵan Murat Esenqabylov syndy birtýar azamattyń erligin eskerse eken. Qazirgideı, áke balaǵa, aǵa inige, halyq bılikke, qul Qudaıyna senýden qalǵan zamanda Eldiń júregin jylytyp, óskeleń órenderge ónege bolar Murattarymyz kóp emes qoı... Jeltoqsan men Qańtarda qansha Qazaqtyń obalyna qaldyq. Onyń da suraýy bolar kún týary – anyq. Taǵy bir anyq bar: "Er qadirin bilmegen, El qadirin bilmeıdi!», dep jazdy.