Erlan Qoshanov Qazaqstannyń túkpir-túkpirinen kelgen eń belsendi áıeldermen, «AMANAT» partıasynyń Áıelder qanaty aıasynda uıymdastyrylǵan «Tomiris» jobasynyń qatysýshylarymen kezdesti. Bul júzdesýde 200-den astam áıel saıası kóshbasshylyqty úırenip, el bolashaǵy úshin mańyzdy sheshimder qabyldaýǵa óz úlesterin qosýǵa daıyn ekendikterin kórsetti.
Áıelder qanaty bir jarym jylda «AMANAT» partıasynyń negizgi qozǵaýshy kúshteriniń birine aınaldy. «Tomiris» jobasyna qatysýshylar Joldaý qazirgi syn-qaterlerge jaýap beredi dep biraýyzdan kelisti. Ásirese, elimizde baıqalyp otyrǵan energıa tapshylyǵy máselesin sheshýdiń eń tıimdi joly – atom elektr stansıasyn salý ekenin de qoldady.
Kezdesýge qatysqan Iadrolyq fızıka ınstıtýtynyń ǵylymı hatshysy Qarlyǵash Munasbaeva men osy ınstıtýttyń ıadrolyq jáne fızıkalyq qaýipsizdik oqý ortalyǵynyń bastyǵy Natalá Izmaılova atom elektr stansıasyn salýdyń qaýipsizdigine qatysty ǵylymı turǵydan óz oılaryn bildirdi. Olardyń aıtýynsha, bul joba ekologıalyq talaptarǵa tolyq jaýap beredi jáne jańa tehnologıalardyń arqasynda Qazaqstan halqy úshin eshqandaı qaýip tóndirmeıdi.
Natalá Izmaılova atap ótkendeı, Qazaqstanda atom energetıkasy salasynda jumys isteıtin joǵary bilikti mamandardy daıarlaý úshin barlyq baza bar. Jas urpaqty ıadrolyq ınjenerıany tańdaýǵa jáne elimizdiń energetıkalyq turaqtylyǵy men qaýipsizdigin qamtamasyz etýge úles qosýǵa shaqyramyz.
Sarqan aýylynan kelgen kásipker Kenjetaı Tazabekova AES qurylysy boıynsha referendým ótkizý – «Halyq únine qulaq asatyn memleket» tujyrymdamasyn júzege asyrýdyń naqty kórinisi ekenin atap ótti. Jańartylǵan Konstıtýsıaǵa halyq daýys bergen kezde de dál osylaı bolǵan edi. Ýaqyt pen osy reformalar tańdaýdyń durys bolǵanyn kórsetti.
Bul joly da birlesip, taǵy bir ortaq, batyl sheshim qabyldap, elimizde atom elektr stansıasyn salýǵa daýys berýimiz kerek!