Sý resýrstary jáne ırrıgasıa mınıstri Nurjan Nurjigitov Azıa jáne Tynyq muhıty óńirine arnalǵan ekonomıkalyq jáne áleýmettik komısıanyń Atqarýshy hatshysy Armıda Alıshahbana bastaǵan BUU delegasıasymen kezdesti. Taraptar sý salasyn sıfrlandyrý baǵytyndaǵy yntymaqtastyq múmkindikterin talqylady.
Nurjan Nurjigitov búginde mınıstrlik Birikken Ulttar Uıymynyń Damý baǵdarlamasymen birlese sý tasqynyn boljaý jáne modeldeý boıynsha TALSIM (Germanıa) jáne Delft-FEWS (Nıderlandy) júıelerin Qazaqstanǵa beıimdeý boıynsha jumys júrgizip jatqanyn málimdedi. Sondaı-aq, bilikti mamandarmen sý salasynyń áleýetin arttyrý baǵytynda atqarylyp jatqan jumystar jaıly aıtty, dep habarlaıdy aqshamnews.kz sala mınıstrligine silteme jasap.
«Elimizdegi 9 joǵary oqý ornymen yntymaqtastyq týraly memorandýmǵa qol qoıdyq. Bıyl «Bolashaq» baǵdarlamasyna sý salasynyń mamandyqtary qosyldy. Qazaqstandyq 2 ýnıversıtet Tashkent ırrıgasıa jáne aýylsharýashylyǵyn mehanıkalandyrý ınjenerleri ınstıtýtymen qosdıplomdy bilim berýdiń birlesken baǵdarlamasyn iske qosty. Taraz qalasynda jeke Ulttyq sý sharýashylyǵy jáne ırrıgasıa ýnıversıteti ashyldy. Endigi maqsatymyz - osy oqý oryndaryna sheteldik úzdik profesor-oqytýshylardy ákelý. Biz Qazaqstanǵa kelýge nıetti nemese qashyqtan oqytýǵa daıyn mamandarmen jumys isteýge ázirmiz», - dedi Nurjan Nurjigitov.
Armıda Alıshahbana mınıstrliktiń sý resýrstaryn damytý jáne qorǵaý, sondaı-aq Aral teńizin qalpyna keltirý jobalaryn joǵary baǵalady.
«Biz óz tarapymyzdan Qazaqstan Respýblıkasynyń «Halyqaralyq Araldy qutqarý» qoryna tóraǵalyǵy aıasynda Ortalyq Azıa memleketteriniń transshekaralyq sý resýrstaryn paıdalaný máselesin retteýge kómek kórsetýge daıynbyz. Sondaı-aq, qazaqstandyq mamandardy sý salasynda tájirıbe almasý maqsatynda uıymdastyrylatyn bizdiń túrli is-sharalarymyzǵa jáne muzdyqtardy qorǵaý jónindegi halyqaralyq jobaǵa qatysýǵa shaqyramyz»,- dedi BUU Azıa jáne Tynyq muhıty óńirine arnalǵan ekonomıkalyq jáne áleýmettik komısıanyń Atqarýshy hatshysy Armıda Alıshahbana.