Qazaqstanda atom elektr stansıasyn (AES) salý eldiń atom ındýstrıasyn damytýǵa jáne tutastaı alǵanda ekonomıkaǵa úlken múmkindik ashady. Bul týraly "AMANAT" partıasynyń qoldaýymen qurylǵan Halyqtyq shtabtyń óńirlerde ótkizip jatqan túsindirý jumystary barysynda aıtyldy.
Úlbi metalýrgıalyq zaýytynyń bas ınjeneri Igor Korobeınıkovtyń aıtýynsha, AES-tiń jumysy kez kelgen basqa jylý elektr stansıasyna uqsas, tek kómirmen jumys isteıtin qazandyqtyń ornyna atom reaktory qoldanylady.
"AES te jylý stansıasy sıaqty belgili bir kólemde sýdy tutynady. Sondyqtan sýdy paıdalaný turǵysynan bul basqa jylý stansıalarynan erekshelenbeıdi," – deıdi ol.
Qazaqstanda AES salý kómirqyshqyl gazynyń shyǵaryndylaryn 7 mıllıon tonnaǵa deıin azaıtýǵa múmkindik beredi. Sonymen qatar, jańa jumys oryndaryn quryp, turaqty jáne arzan energıamen 60 jyldan astam qamtamasyz etedi. Bul elimizdiń energetıkalyq táýelsizdigine qol jetkizýdiń mańyzdy qadamy bolyp tabylady.
Halyqtyq shtab múshesi Amanbaı Nurkenov AES salý máselesi senimdi jáne ekologıalyq taza qýat kózderine degen qajettilikten týyndaǵanyn atap ótti.
"Búgingi tańda elimizdiń ońtústik óńirlerinde elektr qýatynyń tapshylyǵy baıqalýda. Biz kórshi elderden qomaqty kólemde elektr energıasyn satyp alamyz. Sondyqtan AES – energıa tapshylyǵyn sheshýdiń negizgi joly," – deıdi Nurkenov.