QR Prezıdenti janyndaǵy Ortalyq Komýnıkasıalar Qyzmetiniń baspasóz konferensıasynda sóılegen sózinde Almaty qalasy ákiminiń orynbasary Erjan Babaqumarov megapolıstegi kovıdtik stasıonarlardyń KVI tórtinshi tolqyny jaǵdaıynda jáne ol tómendegennen keıingi jumysy týraly aıtyp berdi, dep habarlaıdy almaty-akshamy.kz
Almatyda tórtinshi tolqyn sharyqtaý shegi kezeńinde 10 myńǵa jýyq ınfeksıalyq tósek-oryn daıyndaldy, olardyń 9 myńǵa jýyǵy tartyldy, "delta" tolqynynyń sharyqtaý sheginde olardyń júktemesi 70%-ǵa deıin boldy. Ákimdik rezervinde – 1 000 tósek-oryn.
Búginde ınfeksıalyq stasıonarlarda 3 179 tósek-oryn bar, onyń ishinde 41% qoldanylýda (06.10-ǵa-1 342 pasıent ınfeksıalyq stasıonarlarda tur). Olar Jekenova atyndaǵy QKIB, onyń Degdar kóshesi, 10 fılıaly jáne "Saıaly" shaǵyn aýdanyndaǵy modýldik stasıonar, Naýryzbaı aýdanyndaǵy fılıaly bar MBIB, Degdar, 45 kóshesindegi Ftızıopýlmonologıa ortalyǵynyń Goncharnaıa kóshesindegi fılıaly, №1 QKB, Gýmanıtarlyq-pedagogıkalyq kolej jataqhanasynyń ǵımaratynda ornalasqan №4 QKB 300 tósek-oryndyq fılıaly.
«KVI-diń sharyqtaý sheginde reanımasıalyq tósek-oryndardy 730-ǵa deıin arttyrdyq. Osy kezeńde olardyń júktemesi 70%-ǵa jetti. Infeksıalyq stasıonarlardyń reanımasıasyna tamyz aıynda barlyǵy 2030 pasıent kelip tústi», - dep atap ótti Erjan Babaqumarov.
Almaty ákiminiń orynbasary megapolıstiń reanımasıalyq bólimshelerinde basqa qalalardan kelgen pasıentterdiń sany 33%-ǵa jetkenin atap ótti.
2021 jylǵy 6 qazandaǵy jaǵdaı boıynsha Almatyda RITB-da 310 tósek oryn jumys isteıdi, onyń ishinde 54%-y qoldanysta (RITB-da 172 pasıent). Aýrý juqtyrǵandar sanynyń ósýine jáne stasıonarlardaǵy naýqastar sanynyń birtindep artýyna, reanımasıadaǵy aýyr naýqastar sanynyń kóbeıýine baılanysty ólim-jitim kóbeıdi.
«Qazir biz ahýaldyń turaqtanǵanyn kórip otyrmyz. Qyrkúıek aıynda reanımasıalyq naýqastar arasyndaǵy ólim-jitim tamyzǵa qaraǵanda 18%-ǵa tómendedi. Biraq aýyr naýqastardyń sany saqtalýda, bul pasıentterdiń RITB-te uzaq bolýyna baılanysty – 1 aıdan astam», - dedi Erjan Babaqumarov.
Derttiń sharyqtaý sheginde úı stasıonarynda 15 myńǵa jýyq adam boldy, búginde olardyń sany – 3 500 pasıent.
«Pandemıaǵa qaramastan, biz 9 qalalyq jáne 39 jeke stasıonardy, sondaı-aq 13 respýblıkalyq uıymdy paıdalana otyryp, turǵyndarǵa tolyq kólemde josparly kómek kórsetýge tyrystyq. Qazir kópsalaly klınıkalar burynǵy jumys rejımine qaıta oraldy», - dep atap ótti Erjan Babaqumarov.
Almaty ákiminiń orynbasary sondaı-aq ótken jyly qurylǵan dári-dármekter men medısınalyq buıymdardyń Turaqtandyrý qorynyń arqasynda 2022 jyldyń mamyr aıyna deıin ónimniń 68 ataýynan qajetti qorlar qalyptasqanyn atap ótti.
«Búginde qalaǵa 58,8 mln dana dári-dármek ákelindi, 43,5 mln dana satyldy, 15,3 mln dana bar, onyń ishinde tómendemeıtin qaldyq 8 mln dana nemese 40%-dy quraıdy», - dedi Erjan Babaqumarov.