Almatyda KVI-diń táýliktik ósimi 25 tamyzdan bastap 1,16-dan 0,2%-ǵa deıin tómendedi. Qalada ınfeksıalar sanynyń tómendeýi shamamen 74% qurady. Bul týraly QR Prezıdenti janyndaǵy Ortalyq komýnıkasıalar qyzmetiniń baspasóz konferensıasynda Almaty ákiminiń orynbasary Erjan Babaqumarov málimdedi, dep habarlaıdy almaty-akshamy.kz
Almaty ákimi orynbasarynyń málimetinshe, aǵymdaǵy jyldyń basynan beri KVI-diń 152 myńnan astam jaǵdaıy tirkelgen (152 298). Onyń ishinde aǵymdaǵy jyldyń 19 shildesinen bastap 6 qazanǵa deıin 85 000 jaǵdaı tirkelgen.
«2020 jyldyń jazynda jáne 2021 jyldyń basynda biz «ýhan» shtamymen baılanysty eki tolqynnan óttik. 2021 jyldyń kókteminde – «álfa» shtamymen týyndaǵan tolqyn. 19 shildede «delta» shtamynan týyndaǵan ınfeksıanyń eń aýyr tolqyny bastaldy. Búgin biz osy tolqynnan shyqtyq», - dedi Erjan Babaqumarov.
29 shilde men 25 tamyz aralyǵynda Almaty jaǵdaılardy tirkeýdiń joǵarǵy qabatynda boldy (1500-1600 jaǵdaı). 26 tamyzdan bastap qazirgi ýaqytqa deıin, 7 qazandaǵy jaǵdaı boıynsha ınfeksıanyń tómendeýi jalǵasýda - 1600-dan 423-ke deıin.
«Salystyrmaly taldaý mynany kórsetedi. Eger birinshi tolqyn kezinde Almatyda táýligine juqtyrǵandar sany 250 bolsa, ekinshi jáne úshinshi tolqyn kezinde – shamamen 400 jáne 700 bolsa, "delta" shtamynda táýligine juqtyrý deńgeıi 1600 jáne odan da kóp boldy», - dep habarlady megapolıs ákiminiń orynbasary.
Onyń aıtýynsha, «deltanyń» sharyqtaý sheginde "jedel járdem" shaqyrýlarynyń sany eki eseden astam – 4000-ǵa deıin ósti, olardyń 45%-y KVI jáne kovıdti etıologıanyń pnevmonıasymen baılanysty boldy.
Bul rette KVI tórtinshi tolqyny kezinde stasıonarlarǵa emdeýge jatqyzý deńgeıi 5 eseden astam ósti.
Eger birinshi tolqyn kezinde aýrýhanaǵa jatqyzý táýligine 250 adamǵa deıin, ekinshi jáne úshinshi tolqyn kezinde - 400-450-ge deıin bolsa, tórtinshi tolqyn kezinde aýrýhanaǵa jatqyzý deńgeıi eki ese joǵary boldy jáne táýligine 800 pasıentke jetti.
«Jalpy, densaýlyq saqtaý júıesi aýyr júktemelerge tótep berdi, dári-dármekter men JQQ qory jetkilikti qamtamasyz etildi, irkilister bolǵan joq», - dep atap ótti Erjan Babaqumarov.