Ótken jyldan bastap Almatyda koronavırýstyq ınfeksıa boıynsha qolaısyz epıdemıologıalyq jaǵdaıǵa baılanysty densaýlyq saqtaý salasyndaǵy tásilder tolyǵymen qaıta qaraldy. Bul týraly QR Prezıdenti janyndaǵy Ortalyq komýnıkasıalar qyzmetiniń baspasóz konferensıasynda megapolıs ákiminiń orynbasary Erjan Babaqumarov aıtty, dep habarlaıdy almaty-akshamy.kz
Almaty ákimi orynbasarynyń aıtýynsha, qalada "jedel járdemniń" aýrýhanaǵa jatqyzýdaǵy jalǵyz «kómekshisi» retindegi rólin ózgertýge; qalada dert juqtyrǵandardyń aýyrlyǵy men epıdemıa qarqynyna qaraı tósek-oryndardy basqarý úshin ınfeksıalyq stasıonarlardyń jumysy úsh eshelonǵa bólindi.
«Almatyda MSAK jumysy qaıta jasaqtaldy, onda 364 mobıldi brıgada quryldy jáne ýchaskelik dárigerlerdiń áleýeti kúsheıtildi, emhanalarǵa qosymsha 70 mashına berildi. Ótken jyly qurylǵan Telemedısına ortalyǵy arqyly pasıentterdi úıde emdeýge baqylaý jasaldy», - dedi Erjan Babaqumarov.
Ákim orynbasarynyń aıtýynsha, Almatyda ólim-jitimmen kúresý úshin qalanyń shtattan tys bas reanımatology bastaǵan biryńǵaı reanımasıalyq top jumys isteýde, ol qalanyń barlyq reanımasıalarynyń jumysyna jetekshilik etedi.
Budan ózge, qalada táýliktik qýaty 16 000 zertteýge deıingi 28 PTR-zerthananyń ortalyqtandyrylǵan jelisi (jáne 27 myńǵa deıin ulǵaıtý múmkindigi bar), 14 IFT-zerthana jumys isteıdi. Sondaı-aq Almatyda 28 KT-ortalyqtan turatyn jalpyqalalyq jelisi quryldy.
Budan basqa, qarjy dárilik zattar men JQQ rezervin qurýǵa, jappaı vaksınalaýdy uıymdastyrý úshin tartylatyn mamandardyń eńbegine aqy tóleýge, medısına qyzmetkerlerine COVID-19 epıdemıaǵa qarsy is-sharalarǵa qatysqany úshin ústemeaqy tóleýge, Anestezıologıa jáne reanımatologıa ortalyǵynyń jumys isteýine jáne t. b. baǵyttalǵan.