Erlikti el máńgi jadynda saqtaıdy
Qazaq halqynda batyrlar az bolmaǵan. Olardyń batyrlyq is-áreketi el basyna kún týǵanda kórinedi. Eger naq qaısar júrekti azamat bolsa, onda ony eli ardaqtaıdy. Máńgi este saqtaıdy. Umytpaı artyndaǵy urpaqtaryna úlgi etip otyrady. Sondaı jannyń biri - nebári 24 jyl ǵumyr keship, kózsiz erlik tanytqan er Rataı edi.
Almatynyń S. J. Asfendıarov atyndaǵy Qazaq ulttyq medısına ýnıversıtetinde eki márte «Qyzyl juldyz» ordeniniń ıegeri Rataı Sultanbektiń qurmetine eskertkish taqta qoıyldy.
Sharanyń ótýine Almaty ákimdigi mádenıet basqarmasy men medısınalyq ýnıversıtettiń ujymy muryndyq boldy. Memorıaldyq taqtanyń saltanatty ashylý rásimine batyrdyń nemere inisi Kenishbek Sultanbekov, osy oqý ornynyń rektory Talǵat Nurǵojın, týystary Danıar Aıtbekov, Saılaý Bákiruly, aǵaıyn-týmalary, jaqyndary qatysty. Sóz arasynda birqatar estelikter men oılar ortaǵa salyndy.
Rataı Sultanbek - ekinshi dúnıejúzlik soǵysta aıryqsha erlik kórsetken tulǵa. Ol Ýkraınada áskerı oqýda oqyp, leıtenant shenin alǵan. Sóıtip, 21 jasynda batalón basqarǵan. Belorýssıany, Germanıany azat etýge qatynasqan. Qazaq arasynan shyǵyp, kózsiz erlik, batyrlyq, qaısarlyq kórsetti. Ózimen birge maıdandas bolǵan, Qazaqstannyń Halyq jazýshysy Ábý Sársenbaev shyǵarmalarynda qaısar oǵlannyń batyldyǵyn, rýhty jigit bolǵandyǵyn jazyp qaldyrǵan. Ol jaǵy kópke málim.
Sondaı-aq, jıynda batyr Rataıdyń nemere inisi Kenishbek Párimbekuly joǵaryda keltirgen ómir tarıhyn baıandap berdi. İs-sharany júrgizip, osy istiń basy-qasynda júrgen Zada Arynova da atsalysqan.
Jınalǵan aǵaıyn-jegjattary qazaqtyń qaısar uly, gvardıa maıory Rataı Sultanbekovtiń qurmetine Almatydan kóshe ataýy berilse degen tilegin bildirdi. Sonymen qatar, aldaǵy ýaqytta osyndaı ıgi sharalar jalǵasyn tabýyna nıetti ekendikterin jetkizdi.